Almatyda ótken tamyz jiyny barysynda QR Bilim jáne ǵylym vitse-ministri Ashat Aimaǵambetov bilim salasyndaǵy plagiatpen kúres qalai júrgiziletinin aitty, dep habarlaidy QazAqparat tilshisi.
Vitse-ministr Ashat Aimaǵambetov UBT komissiiasynda jumys istegen kezinde kóshirýge tyrysqandardy jii kórgenin aitty. Almatyda daryndy balalarǵa arnalǵan mektep direktorlarymen, pedagogtarymen kezdesý barysynda vitse-ministr kóshirý problemasymen kúres tetikteri týraly aitty.
«Akademiialyq shynaiylyq bizde joqtyń qasy. Oǵan tárbielemeimiz de. Endi referat, esse, barlyq ýniversitettik jumystar antiplagiat baǵdarlamasymen tekserýden ótedi. Bul tekserýge mektepter de ilinedi. Ár jazba jumysy tekseriledi. Eger plagiat ekeni anyqtalsa, qatań jazalanýy tiis. Daryndy balalarǵa arnalǵan mamandandyrylǵan mektepterde kóshirýge qarsy úrdis qalyptasýy kerek. Bul isti Daryn ortalyǵy baqylaýǵa alýy tiis»,- dedi Ashat Aimaǵambetov.
Onyń aitýynsha, oqýshylar bilimi tek jattaýmen shektelmeýi tiis.
«Kei mektepter 10-11 synyptarda balalardyń basqa sabaqtaryna nuqsan keltire otyryp, túrli kýrstarǵa, testilerge qatystyrady. Bala sabaqty jattaǵannan aqyldy bolyp ketpeidi. Eger, sabaqty tolyq túsinip alsań, kez-kelgen saýalǵa jaýap bere alasyń. Men UBT komissiiasynyń quramynda kóp jyldan beri istep kelem. Bala bilmeitin suraq kep qalsa, únsiz qalady. Eger oǵan týra osy suraqty basqa qyrynan qoisańyz, bala túsine bastaidy. Biz balalardy testke ábden úiretkenimiz sonsha, test suraǵynyń mazmuny ózgertilse, bala túsinbei qalady. Daryndy balalarǵa arnalǵan mektepterde balaǵa jattatýdy toqtatý kerek. Bala oilanyp úirengeni durys. Bul mańyzdy», - dedi pedagogtarǵa Ashat Aimaǵambetov.
Vitse-ministrdiń sózinshe, qazirgi qalyptasyp kele jatqan bilim berý júiesi balanyń oilaý qabiletin arttyrýǵa baǵyttalǵan.
«JOO-lar da kredittik júiege kóshti. Akademiialyq erkindikke baǵyt aldy. Lektsiia, seminar barysynda stýdentter men ustazdar birjaqty bolmai, daýlasyp, talasyp, bir-birine suraq qoiyp otyrýy tiis. Balalar ýniversitetke kelgende olarǵa óte qiyn. Olardyń artynan júretin muǵalim joq», - dedi Ashat Aimaǵambetov.
