Judyryqtai jumylǵan jurtpen birge elimizdiń stýdentteri de qolynan kelgenshe Arys halqyna kómek berýde, dep habarlaidy "Ult aqparat".
«Qazaqstan stýdentter aliansy respýblikalyq uiym bolǵandyqtan, Túrkistan oblystyq jáne Shymkent qalalyq shtabtarymyz bar. Bizde Arys qalasynda eki kolledj ornalasqan. Onda 800-den astam stýdent oqidy. Sol stýdentterden túsken aqparatqa sáikes, bizdiń Alians birden halyqqa kómek kórsetý jumystaryn bastap ketken. Qazirgi ýaqytta jergilikti atqarýshy organdarmen birlese volonterlik shtabtar quryldy. Sol aýmaqtaǵy aýyldyq jerlerge kóshirý jumystary júrgizilýde. Áleýmettik jeli damyǵandyqtan, jeli arqyly barynsha kómek tartý jumystary júrgizilýde. Stýdentter osy ýaqytqa deiin qanshama ata-analarǵa balasyn taýyp berdi», - dedi OQK-da ótken baspasóz máslihatynda Qazaqstan stýdentter aliansynyń prezidenti Iliias Tústikbaev.
Onyń aitýynsha, Túrkistan men Shymkent stýdentteri ǵana emes, jaqsylyq jasaýǵa respýblikanyń búkil stýdentteri atsalysýda.
«Nur-Sultan qalasynyń ákiminiń orynbasarymen shuǵyl otyrys ótkizilip, elorda jastarynan Arysqa kómek retinde aktsiia bastaldy. Respýblika 34 mekenjaiynda ornalasqan Jastar saraiynyń úshinshi qabatynda gýmanitarlyq jáne materialdyq kómek jinaý oryny ashyldy. Kómektesemin degen adamdar sol jerge bara alady. Sonymen qatar, elorda stýdentteri qan tapsyrý aktsiiasyn bastady. Qan tapsyrǵan adamǵa 600 teńge kóleminde aqsha beriledi. Sol aqshany stýdentter Arys halqyna kómektesý úshin ashylǵan resmi shottarǵa aýdarýda», - dedi ol.
Iliias Tústikbaev Ońtústik Qazaqstan memlekettik ýniversitetiniń qyzmetkerleri keshe 13 mln teńge aýdarǵanyn da aityp ótti. Ol ýniversitetke qarasty 3 jataqhanaǵa bes júzden adam jatqyzylǵan. Elordadaǵy birneshe ýniversitet te bir kúndik jalaqylaryn aýdaryp jatyr. L.Gýmilev atyndaǵy EUÝ rektory Arys qalasynyń turǵyndaryn, balalaryn - 1000 adamdy qabyldaýǵa múmkindik baryn jetkizgen.
«Qaiǵyly jaǵdai oryn alǵan kúnnen bastap 150 stýdent volonterlarmen birge jumys istep jatyr. Kóbi kólikterimen halyqqa qolǵabys etýde», - dedi Iliias Tústikbaev.
