Stýdent biýdjet qarajatynan qansha jyl oqysa, tek sol kezeńdi eńbekpen óteidi. Bul týraly tiisti zań jobasyn talqylaý kezinde Májilis depýtaty Ábdimanap Bekturǵanov málim etti, dep habarlaidy QazAqparat.
«Qoldanystaǵy zańǵa sáikes, memlekettik tapsyrys boiynsha bilim alǵan túlekter, iaǵni meditsinalyq ári pedagogikalyq mamandyqtar aiasynda oqýdy bitirgennen keiin olar úsh jyl jumyspen óteýi kerek. Grantpen oqýǵa túsip, osy grantpen oqýdy aiaqtaǵan túlekterge qatysty eshqandai suraqtar joq. Al eger alǵashqy kezde grantpen oqýǵa túsip, keiin aqyly negizge aýysatyn bolsa nemese aqyly negizden grantqa aýyssa, bul turǵyda tiisti suraqtar bar», - dedi depýtat Májilistiń jalpy otyrysynda.
Mysaly, stýdent alǵashqyda grantqa oqý túsip, sońǵy kýrsta aqyly negizge aýysady. Ol aqyly negizde oqýdy támamdaǵannan keiin, túlekter ekbekpen óteýmen qamtylmaidy.
«Sonymen qatar, aqyly negizde oqyp, oqý úlgerimi jaqsy stýdentter úshinshi kýrsta grantqa aýysyp jatady. Olar oqýdy grant esebinen bitirgennen keiin, bul stýdentter úsh jyl jumyspen óteýge tiisti bolady. Osyǵan bailanysty memlekettik tapsyrys kezinde biýdjet qarajatynan qansha jyl oqysa, tek sol kezeńdi eńbekpen óteidi», - dep túsindirdi Á. Bekturǵanov.
Budan buryn habarlanǵandai, Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine bilim berý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy.
Aita keteiik, joǵary oqý ornyn bitirýshiniń memlekettik bilim berý tapsyrysynda oqý uzaqtyǵyna proportsionaldy túrde eńbekpen óteý merzimin belgileý arqyly sheshý usynylady. Osylaisha, memlekettik bilim berý tapsyrysynda bilim alǵan azamattar búkil kezeńde – barlyq úsh jyldy da jumyspen óteitin bolady. Al bilim alýshylar ishinara, iaǵni bir bóligin aqyly negizde – memlekettik biýdjet esebinen oqý kezeńine mólsherles óteitin bolady.
