NATO Reseidiń yqtimal basqynshylyǵyna tótep berý jospary aiasynda odaqqa múshe elderdiń shekaralarynda áskerin turaqty qaldyrý máselesin qarastyryp jatyr.
Bul jóninde NATO bas hatshysy Iens Stoltenberg britandyq The Telegraph basylymyna bergen suhbatynda málimdedi, dep habarlaidy Azattyq.
Onyń aitýynsha, Soltústikatlantikalyq odaq qazir "iri transformatsiia" kezeńinde tur jáne bul protseste Resei prezidenti Vladimir Pýtin áreketiniń uzaqmerzimdik saldary da eskeriledi.
"Qazir kórip otyrǵanymyz – jańa jaǵdai, Eýropa qaýipsizdiginiń jańa normasy. Sol sebepti áskeri jetekshilerimizdi jańa kezeńge qatysty óz usynystaryn aitýǵa shaqyryp otyrmyz" dedi Stoltenberg.
Jýyrda ókileti taǵy bir jylǵa uzarǵanyn málimdegen Iens Stoltenberg The Telegraph basylymyna uiymnyń jumysyn qaita qaraý máselesi boiynsha barlyq sheshim biyl maýsymda Madridte ótetin NATO sammitinde qabyldanatynyn aitty.
Osyǵan deiin Stoltenberg Soltústikatlantikalyq odaqtyń shyǵys qanatyn kúsheitý qajettigin atap ótken.
24 aqpanda bastalǵan Reseidiń Ýkrainaǵa áskeri basqynshylyǵy Eýropada Ekinshi dúniejúzilik soǵystan beri bolmaǵan bosqyndar daǵdarysyn týyndatty jáne batys elderi jetekshilerin qorǵanys saiasatyn qaita qaraýǵa itermeledi.
