Stepnogor qalasyndaǵy olimpiadalyq rezerv daiarlaityn sport mektep-internatynyń tárbielenýshileri arasyndaǵy janjal Nur Otan partiiasy Stepnogor aýmaqtyq filialynyń partiialyq baqylaý komissiiasy men áleýmettik máseleler jónindegi qoǵamdyq keńestiń birlesken otyrysynda qaraldy, dep habarlaidy QazAqparat.
Nur Otan partiiasynyń Stepnogor aýmaqtyq filialynan habarlaǵandai, partiialyq baqylaý komissiiasy partiia filialynyń Saiasi keńesi biýrosyna burynǵy mektep direktory, qalalyq máslihat depýtaty Tursynbai Toqqojinovqa sógis túrinde partiialyq jaza qoldaný arqyly bolǵan oqiǵa úshin partiialyq jaýapkershilik týraly máseleni qaraýdy usyndy.
«Tursynbai Toqqojinovtyń direktor qyzmetinen bosatylýy máseleni bir kúnde sheshpeidi, dálirek aitsaq, oqý ornynda jasóspirimderdiń arasynda álimjettik bar. Bul mektep ákimshiliginiń, pedagogika ujymynyń baqylaýynyń álsizdigi jáne salǵyrttyǵy saldarynan osyndai oqiǵa boldy. Sonymen qatar, mektep direktory oqiǵanyń oryn alǵanyn bile tura, quqyq qorǵaý organdary men kámeletke tolmaǵandar isteri jónindegi komissiiany habardar etpesten ústirtin ishki tergeý júrgizgen. Sondai-aq, dene shynyqtyrý jáne sport basqarmasy da habardar etilmedi», - dep atap ótti vedomstvodan.
Internattaǵy tárbieshilerdiń jumys kestesi standarttarǵa sáikes kelmedi. Belgili bolǵandai, balalar keshki ýaqytta qaraýsyz qalǵan. Sondyqtan otyrysta «Baqytty otbasy» partiialyq jobasy aiasynda mektep-internatqa keshendi monitoring júrgizý jáne tárbie jumysy máselelerine erekshe nazar aýdarý týraly sheshim qabyldandy.
Eske sala keteiik, Stepnogor qalasynyń Bógenbai batyr atyndaǵy sport mektebiniń 8-synyp oqýshysy 7-synyptyń eki oqýshysyna qatysty jataqhana bólmesinde álimjettik jasaǵan bolatyn. Ony uryp-soǵýshy balanyń synyptasy telefonnyń beinejazbasyna túsirip alǵan. Bul beinejazba áleýmettik jelide rezonans týdyrdy.
Aqmola oblysy ákiminiń kóshpeli keńesiniń qorytyndysy boiynsha Dene shynyqtyrý jáne sport basqarmasyna Bógenbai batyr atyndaǵy olimpiadalyq rezerv daiarlaityn sport mektep-internatynyń direktoryn Tursynbai Toqqojinovtyń atqaratyn laýazymyna sáikes kelmeý máselesin qaraý tapsyryldy, dene shynyqtyrý jáne sport basqarmasynyń basshysy Áset Bókibaevqa fýnktsionaldyq mindetterin tiisinshe oryndamaǵany úshin qatań sógis jariialandy.
Sondai-aq, Stepnogor qalasynyń ákimine áleýmettik salaǵa jetekshilik etetin, kámeletke tolmaǵandardyń isteri jáne olardyń quqyqtaryn qorǵaý jónindegi qalalyq komissiianyń tóraiymy, ákimniń orynbasary Gúlnaz Ábilovany tártiptik jaýapkershilikke tartý týraly máseleni qaraý tapsyryldy. Buǵan qosa, oqiǵa boiynsha politsiia qylmystyq is qozǵady.
