Foto: pixabay.com
Stepnogor qalasy mektebiniń bas esepshisi mektep direktorynyń ETsQ kiltin paidalanyp, ózine joǵary jalaqyny zańsyz eseptegen. Sot ony bes jylǵa bas bostandyǵynan aiyrdy, dep habarlaidy Sputnik Qazaqstan.
Stepnogor qalasy mektepteriniń biriniń bas esepshisi mekemeniń shotynan óziniń banktik shotyna qarajat aýdaryp, ol aqshany bankomattardan qolma-qol alyp otyrǵan.
2022 jyldyń sáýirinen 2023 jyldyń naýryzyna deiin esepshi ózine 36 million teńgeden astam somany zańsyz aýdarǵan. Quqyq qorǵaý organdarynyń pikirinshe, esepshi qyzmettik erejeni paidalana otyryp, asa iri mólsherde alaiaqtyq jasaǵan (Qylmystyq kodekstiń 190-baby 4-bóliginiń 2-tarmaǵy).
"Sotta esepshi kinásin tolyq moiyndady. Onyń kinási sot-ekonomikalyq saraptamanyń qorytyndysymen, uialy telefonyndaǵy aqparattarmen, kýágerlerden, mamandardan jaýap alýmen jáne shottar boiynsha bank bergen qujattarmen rastaldy", - delingen is materialdarynda.
Stepnogor qalalyq soty eks-esepshini materialdyq jaýapkershilikke bailanysty qyzmetpen ainalysý quqyǵynan aiyra otyryp, bes jylǵa bas bostandyǵynan aiyrý týraly úkim shyǵardy. Sottalýshydan keltirilgen materialdyq zalal óndirildi.
"Sottalǵan adamnyń asyraýynda tórt jas balasy bar ekenin eskere otyryp, sot Qylmystyq Kodekstiń 74-babynyń 1-bóligi negizinde balasy 14 jasqa tolǵanǵa deiin bas bostandyǵynan aiyrý túrindegi jazany oryndaýdy keiinge qaldyrdy", - delingen vedomstvo habarlamasynda.
Úkim zańdy kúshine engen joq.
