2021 jylǵy 22 qarashada Anatol men Gabriel Stati QR Ulttyq qorynyń 530 million dollar somasyndaǵy aktivterine Belgiiada ýaqytsha salynǵan tyiym kúshin joiýdy qajet etetindigin moiyndady. Bul - Qazaqstan Respýblikasy men Qazaqstan Ulttyq bankine qarsy Belgiiadaǵy protseste Statidiń eshqandai perspektivasy joq ekendiginiń belgisi, dep habarlaidy "Ult aqparat" Ádilet ministrligine silteme jasap.
«Stati salǵan tyiymnyń alynýy Briýssel Apelliatsiialyq sotynyń 2021 jylǵy 16 qarashadaǵy sheshiminiń tikelei nátijesi bolyp tabylady. Bul sheshim Statidiń iri kólemdegi alaiaqtyq shemaǵa qatysy bar jáne ol tek tórelik sotty ǵana emes, sonymen qatar tórelik sheshimniń kúshin joiý jónindegi protsess kezinde Shvetsiia sottaryn da jańylystyrǵanyn anyqtady», - delingen ministrlik habarlamasynda.
Aita ketsek, Stati Belgiiadaǵy sot talqylaýyn 2017 jyldyń sońynda qozǵady. Bul 2018 jylǵy mamyrda Bank of New York Mellon saqtaýyndaǵy QR Ulttyq qoryna tiesili 530 million AQSh dollaryna tyiym salynýyna ákep soqty.
Belgiiadaǵy is júrgizý kelesi úsh protsesti qamtidy: (1) tórelik sheshimdi taný jáne oryndaý boiynsha is júrgizý, (2) ýaqytsha tyiym salý boiynsha is júrgizý jáne (3) aktivterge ýaqytsha tyiym salýdy atqarýshylyq is júrgizýge aýystyrý. Osy protsester Briýsseldiń Apelliatsiialyq sotymen Stati uiymdastyrǵan iri kólemdi alaiaqtyq nátijesinde alynǵan tórelik sheshimge negizdelgen.
Búgingi jańalyqtardy túsindirip ótken Ádilet ministri Marat Beketaev: «Belgiiadaǵy 530 million AQSh dollaryna tyiym salýdan Statidiń óz erkimen bas tartýy – olardyń iri kólemdegi alaiaqtyq áreketteriniń saldarynyń biri ǵana. Stati men olardyń sybailastarynyń, onyń ishinde Deniel Chapman men onyń Argentem Krik kompaniialarynyń alaiaqtyǵynan zańnyń ústemdigin qorǵaý jolynda Ádilet ministrligi qol jetimdi barlyq quraldardy qoldanatyn bolady. Bul quqyqtyq qorǵaý quraldary Respýblikaǵa qarsy Statimen jalǵan jáne zańsyz qýdalaý naýqanyn júrgizip jatqan Belgiiada jáne basqa da iýrisdiktsiialarda bar», - dep atap ótti.
Sonymen qatar QR Ádilet ministrligi qosymsha habarlap ótkendei, ýaqytsha tyiym salý protsesi aiasynda Londonnyń Joǵarǵy sotynda bólek sot protsesi bolǵan.
«Onyń nátijesinde 2020 jylǵy naýryzda Respýblika men Ulttyq bank paidasyna sheshim qabyldandy. Osy Londondaǵy protseste Joǵarǵy sottyń 2021 jylǵy aqpandaǵy Respýblika men Ulttyq banktiń 3,7 million dollar kólemindegi sot shyǵyndaryn tóleýge mindetteitin sheshim Statidiń jeńilisiniń nátijesi boldy. Alaida, Stati sheshimdi osy ýaqytqa deiin oryndamady», - delingen vedomstvo málimetinde.
