Qazaqstan quramasynyń bas bapkeri Stanimir Stoilov Grýziiamen bolǵan matchtan keiin jýrnalister suraqtaryna jaýap berdi, dep habarlaidy QazAqparat Sports.kz portalyna silteme jasap.
- Búgin jaqsy match boldy. Qos komanda da baryn saldy. Grýziianyń jeńisi adal. Birinshi taimda bizdiń oiynshylar aimaqtardy jaqsy qorǵap júrdi. Biraq ekinshi taimda №10 nómirli oiynshyǵa (Giorgi Chakvetadze - avt.) shamasy kelmedi. Ol bizge kóp kedergi jasady. Bul fýtbolshy bizdiń quramamen bolǵan eki oiynda da basymdyq kórsetti.
- Birinshi matchta asa mańyzdy goldy Chakvetadze soqty. Búgingi oiynda da kóp eńbek etti - gol+pas jasady. Oiynǵa daiyndyq kezinde dál osy fýtbolshyǵa qarsy turý týraly mindet qoiǵan joqsyzdar ma?
- Durys aitasyz, grýzin quramasynyń №10 fýtbolshysy eki oiynda da sheshýshi ról atqardy. Jaqsy gol soqty, ózi de jaqsy oiynshy. Bizdiń shetki qorǵaýshylar oǵan qarsy tura almady.
- Motivatsiia jóninde oiynshylarǵa aitar renishińiz joq pa?
- Yntadan góri biliktilik pen senimdilik jetispedi. Búgingi oiynǵa dopty uzaǵyraq qadaǵalaýda ustaityn áldeqaida tájiribeli fýtbolshylar qatysqan joq.
- Debiýtanttar oiynyn qalai baǵalaisyz?
- Búgin biz negizgi quramda buryn oinamaǵan birneshe oiynshynyń ónerin kórýge tiis edik. Olar baryn salyp oinap, kóp ter tókti. Alaida olardyń tájiribesi az, úirenetini kóp ekeni baiqalyp qaldy. Bizdiń shabýylshylar búgin ózderin laiyqty deńgeide kórsete almady. Oraily sátte júz paiyz myqtylyǵyn kórsetýge sál ǵana jetpei qalǵan áttegenai deitin tustar boldy.
- Eki oiynda Qazaqstan qaqpasyna 4 gol soqqan Grýziianyń joly bolyp ketken siiaqty kóringen edi. Jalpy, qos komanda arasyndaǵy biliktilik boiynsha aiyrmashylyq qatty áser etti me?
- Keshegi baspasóz máslihatynda Grýziia toptaǵy birinshi oryndy óz eńbegimen ielengenin, soǵan laiyq ekenin aitqan edim. Olardyń fýtbolshylary ózderine óte senimdi. Bizde qorǵanys boiynsha birqatar problemalar bar. Qazir sony túzetýge tyrysyp jatyrmyz. Naqty pasty jaqsylap oilastyryp, dál iske asyrý ońai emes. Sonymen qatar, shabýylǵa qatysty da kemshilikter bar, ol árbir oraily sáttiń oidaǵydai aiaqtalýyna áser etedi. Onyń ústine bir mańyzdy nárseni aita ketý kerek - búkil týrnir boiynda bizdiń jolymyz bolmady, bizge shynymen de osy nárse jetispedi.
- Keshe siz adam toly stadionǵa qýanatynyńyzdy, odan qoryqpaitynyńyzdy aitqan edińiz. Al búgin ne deisiz?
- Biz odan ózimizge paidaly sabaq ala bildik. Oiyn kezinde atmosfera jaqsy boldy. Men oǵan árqashan qýanyshtymyn. Halyq fýtbol tamashalaýǵa keldi jáne komanda laiyqty oiyn kórsete bildi. Meniń oiymsha, salmaqty qarsylaspen bolǵan osyndai matchtar arqyly bizdiń quramanyń sapasy artyp, óse túsedi.
