Shyǵys Qazaqstan oblysynyń Beloýsovka aýylynda kásipker áieldiń ólimine qatysty qylmystyq is qozǵaldy. Politsiianyń málimetinshe, asa aýyr qylmysqa kúdikti birneshe adam oqiǵa bolǵannan keiin aimaqtan ketýge áreket jasaǵan sátte qolǵa túsken, dep habarlaidy ult.kz.
Aldyn ala málimetterge sáikes, belgisiz adamdar túnde turǵyn úidiń aýmaǵyna zańsyz kirip, otbasy múshelerine shabýyl jasaǵan. Oqiǵa saldarynan kásipker áiel qaza tapqan. Al onyń kúieýi túrli dene jaraqattaryn alyp, Óskemen qalasyndaǵy aýrýhanaǵa jetkizilgen.
Belgili bolǵandai, otbasy Beloýsovka aýylyndaǵy eki qabatty kottedjde turǵan. Marqum qurylys materialdaryn, lak-boiaý ónimderi men turmystyq taýarlardy satýmen ainalysqan.
Qazirgi ýaqytta quqyq qorǵaý organdary oqiǵanyń barlyq mán-jaiyn anyqtap jatyr. Tergeý aiasynda qylmystyń sebebi men basqa da qatysy bar tulǵalardyń bolýy tekserilýde.
