Soltústik Qazaqstan oblysynda 67 jastaǵy ákesine qol kóterip, bolǵan oqiǵany videoǵa túsirip, áleýmettik jelige jariialaǵan 22 jastaǵy jigit bes táýlikke ákimshilik qamaýǵa alyndy, dep habarlaidy ult.kz.
Oqiǵa Shal aqyn aýdanynyń Birlik aýylynda bolǵan. Jelide taraǵan beinejazbada jigittiń ákesin balaǵattap, kúsh qoldanǵany kórinedi. Qoǵamda úlken rezonans týdyrǵan videodan keiin politsiia tekserý jumystaryn bastap, kúdiktini anyqtady.
Tergeý barysynda jigittiń oqiǵa kezinde mas kúide bolǵany belgili boldy. Sot sheshimimen ol turmystyq qatynastar salasyndaǵy quqyqqa qaishy áreketi úshin bes táýlikke ákimshilik qamaýǵa alyndy.
Belgili bolǵandai, 67 jastaǵy zeinetker ulyna qatysty aryz jazýdan bas tartqan. Soǵan qaramastan, politsiia qoldanystaǵy zańnamaǵa sáikes ákimshilik is qozǵap, tiisti shara qoldanǵan.
Soltústik Qazaqstan oblystyq politsiia departamenti bastyǵynyń ókili Sán Jumaǵazinanyń aitýynsha, 22 jastaǵy azamat buǵan deiin de ákimshilik jaýapkershilikke tartylǵan. Onyń ústinen materialdar jinalyp, sot sheshimimen bes táýlikke qamaýǵa alý jazasy taǵaiyndalǵan.
