Meditsina ǵylymdarynyń doktory, immýnolog, professor Pavel Deriabin «Spýtnik-V» vaktsinasynyń nege tez ázirlengenin túsindirdi, dep habarlaidy QazAqparat.
«Shynymdy aitsam, bir jyl buryn pandemiia bastalǵan kezde, vaktsinalar budan da tezirek jasalady dep kútken edim. Sebebi búginde ǵalymdar buryn-sońdy bolmaǵan, eń zamanaýi tehnologiialarǵa ie. Máselen, reseilik «Spýtnik-V» vektorlyq vaktsinasy alǵashqylardyń biri bolyp tez jasaldy dep aitady. Nelikten? Sebebi bul vaktsina basqa vaktsinalardy jasaýda qoldanylǵan nárselerdiń negizinde jasalǵan. Atap aitqanda, Ebola virýsyna qarsy vaktsinalar. Bul aýyr infektsiia bizde de, Reseide de taralǵan joq, infektsiianyń tasymaldaýshylary bolǵan joq. Tiisinshe, Ebolaǵa qarsy vaktsinany jappai óndirý, adamdardy jappai vaktsinalaý da qajet bolmady. Sonymen, vektorlyq vaktsina degenimiz ne? Bul lokomotivy men qajetti jolaýshylar tielgen vagondary bar parovoz sekildi. Bul parovoz baiaǵyda jasalǵan. Endi bul lokomotivke «S aqýyzyn» túzetin genderi bar jańa vagon tirkelgen. «S aqýyzy» adam aǵzasynda paida bolǵanda, oǵan qarsy antideneler bóline bastaidy jáne immýndyq reaktsiia bastalady. Osylaisha, adam atalǵan virýstyq infektsiiadan qorǵalady. Sondyqtan vaktsinalar tez daiyn boldy», - dedi dáriger onlain dáriste.
Onyń aitýynsha, qazaqstandyq vaktsinalar da úirenshikti tehnologiialar boiynsha ázirlenýde. Munda tiri qozdyrǵysh himiialyq zattardyń kómegimen «óltiriledi», biraq immýndyq reaktsiia týdyratyn qabileti ǵana saqtalady. Aýrýdy týdyratyn qabileti saqtalmaidy.
Biologiialyq qaýipsizdik máseleleri ulttyq ortalyǵynyń ǵalymdary tumaýǵa qarsy «óltirilgen» vaktsinalardy jasap kórgen jáne bul tájiribe koronavirýsqa qarsy vaktsina alý kezinde qoldanyldy.
Professor koronavirýsqa qarsy vaktsinalardyń «joq jerden» jasalmaitynyn jáne qazaqstandyq ǵalymdar jańa vaktsinalardy jasaýǵa daiyn ekenin atap ótti.
«Búginde koronavirýsqa qarsy vaktsinalar ártúrli tehnologiialar boiynsha ázirlenýde. Biraq eshqandai vaktsina tiisti synaqtardan ótpeiinshe qoldanýǵa ruqsat berilmeidi. Qazaqstanda qoldanylatyn vaktsinalarǵa kelsek, olarda teoriialyq turǵyda adam aǵzasyna teris áser etý múmkindigi joq. Onyń ústine vaktsinalar qaýipsizdik úshin muqiiat tekseriledi», - dedi P. Deriabin.
