Sporttyq baǵdarlamalaýdy úirengisi keletinder úshin sapaly bilim berý kontentiniń basym bóligi áli de aǵylshyn jáne orys tilderinde usynylady. Bul ásirese IT salasyn qazaq tilinde meńgergisi keletin oqýshylar men stýdentter úshin qosymsha kedergi týdyrady, dep habarlaidy ult.kz.
Qazaqstannyń sporttyq baǵdarlamalaý federatsiiasy osy baǵytta jańa bilim berý platformasyn iske qosty. CPFED platformasynda sporttyq baǵdarlamalaý boiynsha qazaq tilindegi tegin oqý kýrstary qoljetimdi. Oǵan kez kelgen adam tirkele alady: turǵylyqty jeri, daiyndyq deńgeii nemese olimpiadalarǵa qatysý tájiribesi mańyzdy emes.
Platformada beinesabaqtar, teoriialyq materialdar jáne praktikalyq tapsyrmalar bar. Oqýshylar alǵan bilimin birden tájiribede qoldanyp, esep shyǵarý joldaryn taldaidy, sheshimniń logikasyn túsinedi, bazalyq algoritmderdi meńgeredi jáne sporttyq baǵdarlamalaý olimpiadalaryna daiyndala alady.
Kýrstar mektep oqýshylaryna, stýdentterge, oqytýshylarǵa jáne baǵdarlamalaýdy qazaq tilinde úirengisi keletin barlyq azamattarǵa arnalǵan. Onlain format óńirlerdegi balalar men jastar úshin de múmkindik ashady. Ásirese IT úiirmeleri, jattyqtyrýshylar nemese arnaiy bilim berý baǵdarlamalary jetkiliksiz shadǵai eldi mekenderde mundai resýrstyń mańyzy joǵary.
Sporttyq baǵdarlamalaý oqýshyǵa kod jazýdy ǵana úiretpeidi. Bul baǵyt eseptiń shartyn durys túsinýge, tiimdi sheshim tabýǵa, júieli jáne algoritmdik oilaýǵa, shekteýli ýaqyt ishinde naqty nátije shyǵarýǵa daǵdylandyrady. Mundai qabiletter matematika, informatika, injeneriia, derekterdi taldaý jáne jasandy intellekt siiaqty salalardy meńgerýge de kómektesedi.
Qazaq tilindegi kýrstardy iske qosý - Federatsiianyń Qazaqstanda sporttyq baǵdarlamalaýdy damytýǵa baǵyttalǵan júieli jumysynyń bir bóligi. Jobanyń maqsaty - oqýshylardy jarystarǵa daiyndap qana qoimai, baǵdarlamalaýǵa qyzyǵatyn ár balaǵa alǵashqy qadamyn ózine túsinikti tilde bastaýǵa jaǵdai jasaý.
«Mektep oqýshylarynyń baǵdarlamalaýǵa qyzyǵýshylyǵy joǵary ekenin kórip otyrmyz. Biraq kóp jaǵdaida til máselesi balanyń oqýdy erkin bastaýyna áser etedi. Eger oqýshy IT baǵytynda damyǵysy kelse, onyń qazaq tilinde bilim alý múmkindigi bolýy kerek. Sondyqtan biz sporttyq baǵdarlamalaýdy qazaq tilinde úirenýge arnalǵan platformany iske qostyq. Bul - óńirlerdegi talanttardy qoldaýǵa jáne zamanaýi tehnologiialyq daǵdylardy keńinen damytýǵa qosqan úlesimiz», - dedi Qazaqstannyń sporttyq baǵdarlamalaý federatsiiasynyń bas hatshysy Danabek Qaliajdarov.
