Elimizde Álem, Olimpiada chempiondaryn ómir boiy materialdyq qamtamasyz etý máselesi pysyqtalyp jatyr. Bul týraly QR Mádeniet jáne sport ministri Dáýren Abaev aitty, dep habarlaidy QazAqparat.
«Áleýmettik qoldaýdaǵy kelesi mańyzdy másele – joǵary sporttyq nátije úshin ómir boiy ai saiyn materialdyq qamtamasyz etý. Bul máseleni pysyqtap jatyrmyz. Bizde 17-18 jastaǵy jasóspirim chempion, Olimpiada chempiony bola alady. Oǵan birden óte jaqsy aqshalai syiaqy beremiz. Barlyq ákimder, biznesmender, demeýshiler olardy syilyqtyń astynda qaldyrady. Bul durys. Ol nátijege qol jetkizdi, yntalandyrý qajet», - dedi Dáýren Abaev ministrliktiń keńeitilgen alqa otyrysynda.
Biraq, ministr odan keiin atalaǵan adam sporttyq mansabyn aiaqtaǵannan keiin eskerýsiz qalatyndyǵyna nazar aýdartty.
«Búginde ústemeaqy shamamen 70 myń teńge ǵana. Bul múldem durys emes siiaqty. Sondyqtan eger adam jetistikke jetip, úlgi kórsetse, onda ol materialdyq turǵyda laiyqty qamtamasyz etilýi tiis», - dedi ol.
