QR konkimen júgirý sportynan memlekettik jattyqtyrýshy Kenjesh Sársekenova dopingpen ustalǵan sportshylardyń jazasyn kúsheitetin zańǵa qatysty pikir bildirdi. Onyń aitýynsha, baiqamai shalys basqan bir ǵana qadam sportshynyń keleshegine qater tóndiredi, dep habarlaidy QazAqparat.
«Sportshy taza bolýy kerek. Búkil dúnie júzinde sportshylardyń bári dopingten taza bolyp, jarysta ózara myqtyny anyqtasa – naǵyz sport degen sol. Bizdiń býynnyń sportshylary - taza óz kúshimen, eńbegimen kóterilgen azamattar. Jas kezimizde eshqandai vitamin berilmeitin. Oilap qarasańyz, sportshy doping qoldanyp, jeńiske jetip jatsa, onyń aqyry doping qoldanǵany anyqtalmai ketse de abyroi emes. Sol úshin sportshynyń ary taza bolýy tiis», - deidi Kenjesh Sársekenova.
Konkimen júgirý sportynan jattyqtyrýshy óz basynan ótken jaǵdai týraly baiandap berdi.
«1993 jyly Niý-Iorkke jarysqa bardym. Ol kezde doping máselesi búgingidei ótkir emes-tin. Sol joly sýyq tiip, aýyryp qaldym. Úlken sýpermarketten baryp, ystyq shyǵaratyn, murynǵa tamyzatyn dári aldym. Sportshylardy dopingke tekserý barysynda mamandar meniń jótelip, ózimdi jaisyz sezinip turǵanymdy kórdi. «Qandai da bir dári qabyldadyńyz ba?» dep surady. Sol kezde dári ishkenimdi aityp, dári-dármektiń qoraptaryn kórsettim. Qorapty kórgennen keiin mamandar tynyshtaldy. Sóitsem, dáriniń quramynda daý týǵyzatyn komponentter bar eken. Iaǵni, sportshylarǵa endi óte muqiiat bolý kerek. Sportshylar da adam. Temirden jaralǵan joq. Dese de, aýyryp qalsa, birden dáriger men jattyqtyrýshysyna habar berýi kerek. Bárin kelisip otyrǵan abzal», - deidi ol.
Jattyqtyrýshynyń aitýynsha, Dopingke qarsy ulttyq ortalyq sportshylar men bapkerlerdiń bárine qandai dárini ishýge bolatynyn, qandaiyn ishýge bolmaityny kórsetilgen tizim jiberip otyrady.
«Dáriniń quramyna 00,1 gram meldonii bolsa, onyń ózi sportshynyń keleshegi úshin qaýipti degen sóz. Oblys-oblystaǵy barlyq bapker sol tizim boiynsha jumys júrgizedi. Qadaǵalamasa bolmaidy. Baiqamai shalys basqan bir ǵana qadam sportshynyń keleshegine qater tóndirýi múmkin», - deidi bapker.
Aita ketsek, Kenjesh Sarsekenova 1972 jyly týǵan. Jasóspirim qyzdar arasyndaǵy Qazaqstannyń, Álemniń eki márte chempiony, 1994 jyly Lillehammerde (Norvegiia), 1994 jyly Nagano (Japoniia) qysqy Olimpiia oiyndaryna qatysýshy, qysqy Aziia oiyndaryna (1999, Ońtústik Koreia) qatysyp, 1500 m-ge syrǵanaýdan 8-shi, kópsaiysta 9-shy orynǵa ie bolǵan. Álem kýbogynyń kezeńderine, Norvegiia, Gollandiia, Germaniiada ótken halyqaralyq týrnirlerge qatysqan. Konkide júgirýden sport sheberi, eki dúrkin qysqy Olimpiada qatysýshysy, 7 dúrkin QR chempiony.
Eske sala ketsek, búgin Prezident Qasym-Jomart Toqaev «QR Sport jáne dene shynyqtyrý týraly keibir zańnamalyq aktilerge ózgertýler men tolyqtyrýlar engizý týraly» zańǵa qol qoiǵan bolatyn. Zań dopingke qarsy erejelerdi buzǵandardyń jaýapkershiligin qatańdatýǵa, Ulttyq dopingke qarsy uiymnyń mártebesin kúsheitýge baǵyttalǵan.
