QR Mádeniet jáne sport ministri Aqtoty Raiymqulova elimizdegi mektepterdegi sport zaldarynyń keńinen paidalaný qadamdary týraly aitty, dep habarlaidy QazAqparat
«Keshendi josparda óńirlik sport basqarmalary men bilim berý basqarmalary halyqtyń barlyq jas sanattarynyń sport sektsiialaryna qatysý múmkindigin kózdep, jalpy bilim beretin mektepterdiń sport zaldaryna qoljetimdilikti qamtamasyz etý jóninde memorandýmdar jasaý eskerilgen. Búginde elimizde sport zaldary 5 428 jalpy bilim beretin mektepte bar. Eń tómengi esepteýler boiynsha usynylǵan sport zaldarynda 20-ǵa jýyq adam, ortasha eseppen 1,5 saǵattan qosymsha shuǵyldana alady. Bul jalpy alǵanda 100 myńnan astam adamdy quraidy», - dedi ministr Ortalyq kommýnikatsiialar qyzmetindegi onlain baspasóz máslihatynda.
Onyń sózine qaraǵanda, josparda halyqpen jumys isteý úshin sport boiynsha nusqaýshylardyń sanyn arttyrý kózdelip otyr. Búgingi tańda aýyldyq jerlerde 1 345 mamanǵa qajettilik bar. Bul shara ásirese aýyldyq jerlerde jańa jumys oryndaryn qurýǵa múmkindik beredi.
«Osy sharany iske asyrý nátijesinde - 600 myńǵa jýyq adam dene shynyqtyrýmen jáne sportpen ainalysýǵa tartylady», - dedi Aqtoty Raiymqulova.
Aita keteiik, Dene shynyqtyrý jáne buqaralyq sportty damytý jónindegi 2020-2025 jylǵa arnalǵan keshendi jospary ázirlendi. Bul josparda múddeli memlekettik organdardyń, jergilikti atqarýshy organdardyń usynystary tolyq eskerilip, QR Premer-Ministrimen bekitildi.
