QR Memlekettik hatshysy Qyrymbek Kósherbaev elimizdiń sport salasyna kezek kúttirmes reformanyń qajettigin alǵa tartty, dep habarlaidy QazAqparat.
«QR Prezidenti Qasym-Jomart Toqaev sizderdiń el aldyndaǵy eńbekterińiz ben Olimpiadadaǵy jetistikterińizdi eskerip, memlekettik nagradalarmen marapattaý týraly jarlyq qabyldady. Bul eńbektiń elengeni, tógilgen terdiń óteýi dep bilemiz. Marapattaryńyz qutty bolsyn! Osy oraida bir máseleni aitpai ketýge bolmaidy dep oilaimyn, Tokio Olimpiadasy elimizdegi sport salasynyń shynaiy bet-beinesin ashyp, ondaǵy ahýaldyń qandai ekenin ashyq kórsetti. Sport salasyna shuǵyl reforma qajettigi kórinip tur. Birde-bir sportshynyń altyn nemese kúmis júldege qol jetkize almaýy buryn-sońdy bolmaǵan jaǵdai. Jalpy komandalyq esepte 83 oryndy mise tutý bizdiń elimiz úshin árine syn», - dedi Qyrymbek Kósherbaev.
Onyń aitýynsha, Tokio Olimpiadasyna qatysty jankúierlerdiń syn-eskertpeleri men halyqtyń talaby oryndy.
«Sondyqtan Tokio Olimpiadasynan sabaq alyp, qorytyndy shyǵarýymyz qajet. Memleket basshysy Qasym-Jomart Toqaev ulttyq quramanyń bul kórsetkishi Qazaqstannyń sporttyq áleýetine jáne memleket tarapynan sportty damytýǵa bólinip otyrǵan mol qarajatqa sáikes kelmeidi dep naqty aitty. Memleket sportty órkendetý úshin, sportshylarymyzdyń álemdik arenada Qazaqstannyń namysyn abyroimen qorǵaýy úshin bar jaǵdaidy jasap otyr, qarjy ýaqytyly bólinedi, oqý-jattyǵý jiyndary der kezinde uiymdastyrylady. Ulttyq qurama músheleriniń materialdyq turǵydan tapshylyq kórgen kezi joq. Sporttyq infraqurylym jyl saiyn jańaryp keledi, degenmen nátije áli tómen», - dedi Q. Kósherbaev.
Buǵan deiin habarlaǵanymyzdai, QR Memlekettik hatshysy Tokio-2020 Olimpiadasynyń jeńimpazdaryn jeńisimen quttyqtap, QR Prezidenti Qasym-Jomart Toqaevtyń atynan birqatar memlekettik nagradalardy tabys etti.
