2025 jylǵa deiin aýyldyq jerlerde 259 mádeniet úiin salý josparǵa engizildi. Bul týraly Májilistiń jalpy otyrysynda QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Mádeniet jáne sport salasynda 2025 jylǵa deiin aýyldyq jerlerde 259 mádeniet úiin salý jáne jóndeý jumystarymen 1241 mádeniet nysanyn qamtý josparlanǵan.
Bul óte qajetti baǵyt. Sondyqtan ultymyzdyń ónegeli ónerin zamanaýi mádenietpen ushtastyra damytý úshin, eldegi ónerli jastardy qoldaý úshin bul jumystarǵa erekshe kóńil bólemiz», - dedi E. Toǵjanov.
Sonymen qatar ol turǵyndardy sport keshenderiniń jetispeýshiligi alańdatyp otyrǵanyn atap ótti.
«Byltyr 21 mlrd teńge kásipqoi sporttan buqaralyq sportqa qaita baǵyttaldy. Qarajat negizinen balalar sport sektsiialaryn qarjylandyrýǵa jáne sport infraqurylymyn salýǵa jumsaldy. Nátijesinde, 275 myńnan astam bala memlekettik tapsyrys boiynsha tegin sektsiialarmen qamtylǵan. 41 dene shynyqtyrý-saýyqtyrý kesheni paidalanýǵa berildi.
Qazirgi kezde 2025 jylǵa deiin sport infraqurylymyn damytýdyń kestesi ázirlenýde, oǵan sáikes eldi mekenderde 115 sport nysanyn salý josparlanyp otyr», - dedi Úkimet basshysynyń orynbasary.
«Koronavirýs pandemiiasy densaýlyqtyń mańyzyn kórsetti. Búgingi kúni birlesken kúsh-júgerimizdiń arqasynda infektsiianyń taralýyn tejedik. Endi sportqa jáne dene shynyqtyrýǵa erekshe nazar aýdarýymyz qajet. Halqymyzda «aýyryp em izdegenshe – aýyrmaityn jol izde» degen naqyl sóz bar. Salaýatty ómir saltyn damytý baǵdarlamasyn iske asyrý arqyly densaýlyq salasyna jumsalatyn 300 mlrd teńge qarajatty únemdeýge bolatynyn aitqym keledi. Barshańyzdy osy baǵdarlamany birlese iske asyrýǵa shaqyramyn», - dedi Eraly Toǵjanov.
Aita keteiik, búgin Májilistiń jalpy otyrysynda óńirlerge shyǵý barysynda QR Parlamenti Májilisiniń depýtattaryna kelip túsken azamattardyń ótinishterin memlekettik organdardyń qaraý nátijeleri talqylanyp jatyr. Depýtattardyń óńirlerge saparlary barysynda kóterilgen eki myńǵa jýyq suraq Úkimet tarapynan jan-jaqty saraptalyp, qaraldy.
