Tuńǵysh Prezident kúni qarsańynda Elbasymyzdyń «Bolashaqqa baǵdar: rýhani jańǵyrý» baǵdarlamalyq maqalasynyń «Týǵan jer» baǵdarlamasy aiasynda Sozaq aýdanynyń ortalyǵyndaǵy «Myńjylqy» mádeniet saraiynda «Terbetilgen Teriskeidiń qushaǵynda» atty merekelik shara ótti, dep habarlaidy Ult.kz tilshisi.
Merekelik sharanyń basty keiipkerleri - Almaty qalasyndaǵy Qazaq Ulttyq pedagogikalyq ýniversitetiniń Abai ǵylymi zertteý institýtynyń direktory, abaitanýshy ǵalym Jabal Shoiynbetov pen Ońtústik Qazaqstan pedagogikalyq ýniversitetiniń filologiia fakýltetininń dekany, filologiia ǵylymdarynyń kandidaty, dotsent, Qazaqtan Jýrnalister odaǵynyń múshesi Nariman Nurpeiisovtiń aýdan jurtshylyǵymen kezdesýi ótti.
«Rýhani jańǵyrý» baǵdarlamasy aiasynda týǵan ólkesine at basyn tiregen ǵalymdar rýhani jańǵyrý, latyn álipbii, týǵan jer tarihy, onyń dańqty perzentteri haqynda ózderiniń estip bilgen esti pikirlerin tereń tolǵanyspen áńgimelep berdi. Mádeniet saraiynda ótken sharaǵa qatysýshylardyń deni jastar bolǵandyqtan, týǵan til, jer men el tarihy jaily aitqan ǵalymdardyń oily áńgimeleri olarǵa mol ǵibrat bergendei boldy.
Merekelik sharany aýdan ákiminiń orynbasary Baǵdat Aidarbekov ashyp, kelgen qonaqtar men aýdan jurtshylyǵyn 1 jeltoqsan - Tuńǵysh Prezident kúnimen quttyqtap, arnaiy kelgen qonaqtardyń iyǵyna shapan jaýyp, ǵibratty qonaqjailyq tanytty.
Sonymen qatar, aýdandyq «Myńjylqy» mádeniet úiiniń kórkemónerpazdarynyń shaǵyn kontserttik baǵdarlamasy kópshilik nazaryna usynyldy. Sharada Qulynshaq Kemeluly atyndaǵy shyǵarmashylyq birlestiktiń tóraǵasy, aqyn Myńjasar Asqarov, aqyn Baidilda Aidarbekov quttyqtaý tilekterin bildirdi.
Merekelik sharanyń sońynda kesh ieleri ǵalymdar Jabal Shoiynbetov pen Nariman Nurpeiisovter osynaý igi sharany uiymdastyryp, kútip alyp, zor qurmet kórsetip jatqan aýdan basshylyǵyna, sharaǵa belsendi túrde qatysyp otyrǵan aýdan turǵyndaryna shynaiy izgi tilegin bildirip alǵystaryn aitty.
- Biz úshin keshegi tarih jylnamasynda «Sozaqqa barsań, kúishimin deme!» dep mol anyqtaýysh berip ketken Muhtar Áýezvtiń tilimen aitqanda Sozaqtyń ózin "ulttyq kod" dep aitsaq bolady. Munda qanshama qasterli oryndar, kieli jerler, tarihi eskertkishter, áýlie-ámbieler jatyr. Bul tarihi ǵibrattardy boiǵa sińire bilsek, onyń ózi biz úshin ulttyq rýhani azyq ekeni daýsyz, - dedi ǵalym Nariman Nurpeiis.
