Qazaqstan Respýblikasynyń Táýelsizdik kúni merekesine orai, Túrkistan oblysy, Sozaq aýdanynyń ákimi Polatov Salyhan Sabyruly «Saýap» medalimen jəne alǵys hatpen marapattaldy.
Elimizdiń damý strategiiasynda halyqtyń áleýmettik jaǵynan osal toptaryn qorǵaý basym baǵyttardyń biri retinde qarastyrylǵan. Al áleýmettik sala qoǵam ómirinde basty ról atqaratyny belgili. Sol sebepti de Qazaqstan respýblikasy táýelsizdik alǵan jyldardan bastap qoǵamnyń álsiz tusyna airyqsha kóńil bólip keledi.
Osyǵan orai, elimizdiń Prezidenti Nursultan Nazarbaevtyń halyqqa arnaǵan Joldaýynda kórsetilgendei «Múmkindigi shekteýli azamattarǵa qoldaý kórsetip, qoǵamdaǵy belsendiligin arttyrýdy» basty nazarǵa alǵan azamattar «Saýap» medalimen marapattalady. Bul marapatty «Asar» múgedekter qoǵamy» qoǵamdyq birlestigi múmkindigi shekteýli adamdarǵa kómek pen qoldaý kórsetken qaiyrymdylyq qorlaryna, dárigerlerge, ákimderge, depýtattarǵa, mekeme basshylaryna jeke adamdarǵa jyl saiyn taǵaiyndaidy.
Biyl bundai marapatqa Túrkistan oblysy Sozaq aýdanynyń ákimi ie boldy. «Asar» Ońtústik Qazaqstan múgedekter qoǵamy» qoǵamdyq birlestiginiń marapaty Qazaqstan Respýblikasynyń Táýelsizdik kúni merekesine orai tabystady. Bul qazaq handyǵynyń eń birinshi astanasy bolǵan qala – Sozaqtyń sońǵy jyldary oblystyń ýrany men shubatyn brendke ainaldyryp qana qoimai, sonymen birge áleýmettik sala jumystaryna da basymdyq berip, múmkindigi shekteýli adamdardyń táýelsiz ómir súrýine jaǵdai jasaý maqsatyna beiimdeý jumystaryn jandandyryp jatqanynyń dáleli.
Aýdan basshysy Polatov Salyhan Sabyruly aldaǵy ýaqytta da múmkindigi shekteýli azamattarǵa qoldaý bildiretindigin aitty.
