Memlekettik qyzmet kórsetý máseleleri jónindegi vedomstvoaralyq komissiia (VAK) kezekti otyrysta melekettik organdarmen birlesip Memlekettik qyzmetter tiziliminen birqatar anyqtamalardy alyp tastaý máselesin talqylady. Otyrysta 24 aqparattyq anyqtama týraly sóz boldy, dep habarlaidy "Ult aqparat" Tsifrlyq damý, innovatsiialar jáne aeroǵarysh ónerkásibi ministrliginiń baspasóz qyzmetine silteme jasap.
«Búgingi tańda memlekettik tizilimde 694 qyzmet bar, onyń 49-y - anyqtamalar. Azamattar bul anyqtamalardy basqa memlekettik organǵa berý úshin bir memlekettik organnan suratýy kerek. Bul shamadan tys qaǵazbastylyq pen biýrokratiiaǵa ákeledi. Sondyqtan, memlekettik organ azamattardyń ruqsatyn ala otyryp, óz áriptesterinen ózdiginen surai alatyn málimetteri bar birqatar anyqtamalardy alyp tastaý usynylady», - dedi ministrliktiń Memlekettik qyzmetter komitetiniń tóraǵasy Ádilet Kósherbaev.
Bul rette memlekettik organdar aqparattyq júielerdegi derekter bazasyn biriktirý arqyly qajetti málimetterdi ala alady. Al aqparatty basqa adam nemese negizgi aqparattyq júielerdi paidalanýǵa ruqsaty joq uiym suratqan jaǵdaida, azamat úshinshi tulǵa servisi arqyly ózi týraly málimetterdi usynýǵa ruqsat bere alady nemese bas tarta alady.
Tizilimnen shyǵarýǵa usynylǵan anyqtamalar qatarynda «Sottylyqtyń bolýy nemese bolmaýy týraly», «Ýaqytsha eńbekke jaramsyzdyǵy», «Memlekettik jer kadastrynan málimetter berý» jáne t. b.anyqtamalar bar.
Ótken komissiia otyrystarynyń sheshimimen 5 túrli anyqtama alynyp tastalǵan. Olardyń qatarynda mekenjai anyqtamasy, joǵary oqý ornyn jáne odan keiingi bilimdi aiaqtamaǵan tulǵalarǵa anyqtama berý jáne t.b. bar. Bul qaǵaz qujat ainalymyn 14 mln qujatqa qysqartýǵa múmkindik berdi.
Vedomstvoaralyq komissiianyń tóraǵasy – Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev memlekettik organdardyń osy protseske tehnikalyq daiyndyǵynyń mańyzdylyǵyn aityp ótti.
«Memleket basshysy bizge keńes alý, anyqtama alý jáne ótinish berý operatsiialaryn onlainǵa kóshirý mindetin tapsyrdy. Biz bul turǵyda memlekettik qyzmetterdi proaktivti tásilmen kórsetý kerek dep sanaimyz. Sondyqtan memlekettik organ ózi ala alatyn anyqtamany joiýy kerek. Alaida, barlyq memlekettik organdar buǵan tehnikalyq jaǵynan daiyn bolýy qajet», - dedi ministr.
Sondai-aq, otyrysta eńbek jáne halyqty áleýmettik qorǵaý, mádeniet jáne sport, qarjy, ishki ister, densaýlyq saqtaý jáne t. b. salalardaǵy memlekettik qyzmetterdi ońtailandyrý jáne avtomattandyrý máseleleri qaraldy.
