Búgin QR Ishki ister ministrligi Qylmystyq atqarý júiesi komitetiniń tóraǵasy Janat Eshmaǵambetov sottalýshylardy jumyspen qamtý jaiynda aityp berdi, dep habarlaidy QazAqparat.
«Taiaýda Adam quqyqtary jónindegi ýákilmen birge Almaty oblysyndaǵy birneshe mekemege, onyń ishinde Zarechnyi eldi mekenindegi mekemege bardyq. Sotalýshylardyń biri tabysty biznesin quryp, shamamen 340 adamdy jumysqa ornalastyrǵan etti qaita óńdeý tsehynda boldyq. Ónimderin qaladaǵy jáne oblystaǵy saýda núktelerinde satady. Olar tabysty jumyspen qamtylǵan, salyqtaryn tóleidi. Mundai mysaldar kóp. Shyǵys Qazaqstan oblysynda aǵash óńdeý qarqyndy damýda. Tipti sottalýshylardyń biri mýzykalyq aspaptar shyǵaratyn óndirisin ashyp alǵan. Qaraǵandy oblysynda tipografiiialyq, poligrafiialyq ónimder shyǵarýǵa, metall óńdeýge qatysty sátti mysaldar jetkilikti. Kásipkerlik daǵdylaryn eskere otyryp, sottalýshylar mekeme aýmaǵynda túrli biznes ashyp, jeke kásipkerlik pen jaýapkershiligi shekteýli seriktestikterdi tirkeidi», - dedi komitet tóraǵasy Ishki ister ministrligi alańynda ótken baspasóz máslihatynda.
Onyń atap ótýinshe, jalaqy elimizdiń eńbek zańnamasyna sáikes tólenedi. Jumys berýshimen jumysshy arasynda eńbek kelisimsharty jasalady.
«Jalaqy ortasha eńbekaqynyń tómengi kóleminen tómen bolmaýyn ǵana talap etemiz. Ádette ol daiyndalǵan ónimniń sapasy men kólemine bailanysty. Aýdarymdarǵa qatysty aitar bolsam, sottalýshylardyń kópshiligine sot talaby bar. Soǵan orai olardyń jalqysynyń 50 paiyzyna deiingi mólsheri bereshekterin jabý úshin ustalynady. Qalǵan bóligin qalaýynsha jumsaidy nemese bostandyqqa shyǵatyn kezine saqtap qoia alady», - dedi Janat Eshmaǵambetov.
