Sottalǵandardyń basym bóligi jazasyn ótegennen keiin túrmege qaityp oralmaidy. Mundai pikirdi QR Ulttyq ulany «Batys» óńirlik qolbasshylyǵynyń qolbasshysy Arman Jumaǵaliev bildirdi, dep habarlaidy QazAqparat.
«Búginde Ulttyq gvardiia bári úshin de ashyq. Tipti áskeri qyzmette bolmaǵan tanystarymnyń kópshiligi ol jaiynda kóp jaittan qulaǵdar. Iaǵni, olardyń nemen ainalysatynyn, qoǵamdyq tártipti qadaǵalaýda qandai is atqarǵanyn, onyń ishinde túzetý mekemelerin kúzetetindigin jaqsy biledi. Olar túzetý mekemelerinde qaita tárbieleýdi qajet etetin adamdardyń ustalatyndyǵyn túsinedi», - dedi ol QazAqparat tilshisimen telefon arqyly tildesý barysynda.
Sonymen qatar ol túzetý mekemeleriniń jumys tiimdiligine qatysty da oiymen bólisip ótti.
«Qoǵamymyzda túrli adamdar bar. Olardyń psihologiiasy, dúnietanymy, kózqarasy ártúrli bolyp keledi. Túzetý mekemeleri sottalǵandardy 100 paiyz durys jolǵa túsiredi dep aita almaimyn. Shamamen 82 paiyzy qalypty ómirge oralatyndyǵy ras. Sońǵy ýaqytta túzetý mekemesine qaitadan keletin adamdardyń sany kúrt azaidy. Máselen, Keńes odaǵy zamanda túrmege qaitadan túsetin sottalýshylardyń sany kóbirek bolatyn. Qazir olar bostandyqqa shyqqannan keiin jumysqa ornalasyp, qoǵamǵa sińisip ketip jatyr. Sondyqtan sottalǵandardyń basym bóligi kolloniiaǵa qaityp túspeidi», - dedi Arman Jumaǵaliev.
«Batys» óńirlik qolbasshylyǵynyń qolbasshysy sóz sońynda áskeri qyzmetti tańdaýyna ákesi sebepker bolǵanyn aitty.
«Ákem áskeri qyzmetshi bolǵannan keiin osy mamandyqty tańdadym. Eki atam soǵysta mert boldy. Osy sebepter mamandyq tańdaýyma túrtki bolyp, áskeri qyzmetti tańdaǵan edim», - dedi ol.
