Qaraǵandy oblysynda Sotsialistik Eńbek Eri Nurbaqyt Qabdykárimova 17 sáýirde 72 jasqa qaraǵan shaǵynda ómirden ótti, dep habarlaidy "Ult aqparat".
Nurbaqyt Qabdykárimova ótken ǵasyrdyń 60-70 jyldarynda apasy Kámshat Dónenbaevadan keiin qazaq qyzdaryna tehnika tizgindeýge úndeý tastap, qarshadaiynan eńbekke aralasqan Qarqaralynyń qaisar qyzy.
Ol 1948 jyly 3 qarashada Qarqaraly aýdany, qazirgi Martbek Mamyraev atyndaǵy aýylda dúniege kelgen. Eńbek jolyn 1966 jyly týǵan aýylynda qarapaiym jumysker bolyp bastady. Shopannyń kómekshisi, keiin mehanizatorlar kýrsyn bitirip, tehnika tizginin ustaǵan. Jastaiynan «MTZ», «T-4» traktorlaryn taqymdaǵan eńbekqor qyz «K-700» alyp traktoryna da alǵashqylardyń biri bolyp bas bildirgen.
Adal eńbegimen ómirlik baqytyn eselegen maitalman 1972 jyly Lenin ordenimen marapattaldy. BLKJO-nyń, Qazaqstan LKJO-nyń birneshe sezine delegat bolyp qatysyp, birneshe ret aýdandyq, oblystyq keńestiń, al 1975 jyly QazKSR Joǵarǵy Keńesiniń depýtaty bolyp sailandy. Aýyl sharýashylyǵy salasyndaǵy uzaq jylǵy eńbegi 1982 jyly memleket tarapynan joǵary baǵalanyp, Sotsialistik Eńbek Eri atandy. Omyraýynda ekinshi Lenin ordeni men «Oraq pen Balǵa» Altyn Juldyzy jarqyraǵan batyr qyz Táýelsizdik jyldarynda da talai jastarǵa tálimger bolyp, jas Qazaqstan memleketiniń órkendeýine ózindik úlesin qosty.
«Qarqaralynyń Kámshaty», «Darhan dalanyń Darabozy» atanǵan Nurbaqyt Qabdykárimqyzynyń qazasyn barsha qaraǵandylyqtar qabyrǵasy qaiysa qabyldap, oblys ákimi Jeńis Qasymbek marqumnyń otbasyna, týǵan-týystaryna kóńil aitty.
«Ol zeinet demalysyna shyqqansha aýyr eńbekten qol úzgen joq. Óz esimine sai, ómirdiń nuryn da, baqytyn da adal eńbekten tapty. Eńbegimen er atandy. Nurbaqyt Qabdykárimovanyń ónegeli ómir joly - jas urpaqqa úlgi. Onyń jarqyn beinesi bizdiń júregimizde máńgi saqtalady», - delingen oblys ákiminiń kóńil aitý hatynda.
