قاراعاندى وبلىسىندا سوتسياليستٸك ەڭبەك ەرٸ نۇرباقىت قابدىكەرٸموۆا 17 سەۋٸردە 72 جاسقا قاراعان شاعىندا ٶمٸردەن ٶتتٸ, دەپ حابارلايدى "ۇلت اقپارات".
نۇرباقىت قابدىكەرٸموۆا ٶتكەن عاسىردىڭ 60-70 جىلدارىندا اپاسى كەمشات دٶنەنباەۆادان كەيٸن قازاق قىزدارىنا تەحنيكا تٸزگٸندەۋگە ٷندەۋ تاستاپ, قارشادايىنان ەڭبەككە ارالاسقان قارقارالىنىڭ قايسار قىزى.
ول 1948 جىلى 3 قاراشادا قارقارالى اۋدانى, قازٸرگٸ مارتبەك مامىراەۆ اتىنداعى اۋىلدا دٷنيەگە كەلگەن. ەڭبەك جولىن 1966 جىلى تۋعان اۋىلىندا قاراپايىم جۇمىسكەر بولىپ باستادى. شوپاننىڭ كٶمەكشٸسٸ, كەيٸن مەحانيزاتورلار كۋرسىن بٸتٸرٸپ, تەحنيكا تٸزگٸنٸن ۇستاعان. جاستايىنان «متز», «ت-4» تراكتورلارىن تاقىمداعان ەڭبەكقور قىز «ك-700» الىپ تراكتورىنا دا العاشقىلاردىڭ بٸرٸ بولىپ باس بٸلدٸرگەن.
ادال ەڭبەگٸمەن ٶمٸرلٸك باقىتىن ەسەلەگەن مايتالمان 1972 جىلى لەنين وردەنٸمەن ماراپاتتالدى. بلكجو-نىڭ, قازاقستان لكجو-نىڭ بٸرنەشە سەزٸنە دەلەگات بولىپ قاتىسىپ, بٸرنەشە رەت اۋداندىق, وبلىستىق كەڭەستٸڭ, ال 1975 جىلى قازكسر جوعارعى كەڭەسٸنٸڭ دەپۋتاتى بولىپ سايلاندى. اۋىل شارۋاشىلىعى سالاسىنداعى ۇزاق جىلعى ەڭبەگٸ 1982 جىلى مەملەكەت تاراپىنان جوعارى باعالانىپ, سوتسياليستٸك ەڭبەك ەرٸ اتاندى. ومىراۋىندا ەكٸنشٸ لەنين وردەنٸ مەن «وراق پەن بالعا» التىن جۇلدىزى جارقىراعان باتىر قىز تەۋەلسٸزدٸك جىلدارىندا دا تالاي جاستارعا تەلٸمگەر بولىپ, جاس قازاقستان مەملەكەتٸنٸڭ ٶركەندەۋٸنە ٶزٸندٸك ٷلەسٸن قوستى.
«قارقارالىنىڭ كەمشاتى», «دارحان دالانىڭ دارابوزى» اتانعان نۇرباقىت قابدىكەرٸمقىزىنىڭ قازاسىن بارشا قاراعاندىلىقتار قابىرعاسى قايىسا قابىلداپ, وبلىس ەكٸمٸ جەڭٸس قاسىمبەك مارقۇمنىڭ وتباسىنا, تۋعان-تۋىستارىنا كٶڭٸل ايتتى.
«ول زەينەت دەمالىسىنا شىققانشا اۋىر ەڭبەكتەن قول ٷزگەن جوق. ٶز ەسٸمٸنە ساي, ٶمٸردٸڭ نۇرىن دا, باقىتىن دا ادال ەڭبەكتەن تاپتى. ەڭبەگٸمەن ەر اتاندى. نۇرباقىت قابدىكەرٸموۆانىڭ ٶنەگەلٸ ٶمٸر جولى - جاس ۇرپاققا ٷلگٸ. ونىڭ جارقىن بەينەسٸ بٸزدٸڭ جٷرەگٸمٸزدە مەڭگٸ ساقتالادى», - دەلٸنگەن وبلىس ەكٸمٸنٸڭ كٶڭٸل ايتۋ حاتىندا.
