Almatyda sot "Ábliazovtyń urlaǵan qarjysynyń bir bóliginiń izin gazeti arqyly jasyrǵan" degen aiyppen isti bolǵan jýrnalist Janbolat Mamaidy shartty túrde 3 jylǵa bas bostandyǵyn shekteýge úkim kesip, sot zalynan bosatty.
Sýdia Dáýren Máýkeev "Mamaidyń aiyby sot barysynda tolyq dáleldengenin" aityp, ony 3 jylǵa jýrnalistik qyzmet isteý quqyqyǵynan aiyrdy. Sot úsh jyldan Mamaidyń aqpan aiynan beri qamaýda otyrǵan jeti aiǵa jýyq ýaqytyn shegerip, endi 2 jyl 5 ai 5 kún bas bostandyǵy shekteletinin aitty.
Úkimdi jalǵastyrǵan sýdia Janbolat Mamaidyń «aýyr qylmys jasaǵany tolyq dáleldengenin, biraq otbasylyq jaǵdaiyna bailanysty jazasy jeńildetilgenin, sondyqtan qazirden bastap bostandyqqa shyǵatynyn» habarlady.
Aiyptaýshy prokýror jariialaǵan aiyptaý aktisine qaraǵanda, BTA Banktiń burynǵy basshysy ári oppozitsiialyq saiasatker Muhtar Ábliazov jymqyrǵan qarjysynyń izin jasyrý maqsatynda "2011-2014 jyldary BTA Banktiń basqarma tóraǵasynyń burynǵy orynbasary, sol kezde shetelde bolǵan Jaqsylyq Jarymbetov arqyly Janbolat Mamaimen bailanysqan. Jarymbetov Mamaimen Skype arqyly bailanysqan jáne úshinshi adam arqyly 110 myń dollar kóleminde qarjy bergen. Mamai qarjyny gazet shyǵarýǵa jumsaǵan".
Qyrkúiektiń 4-inde ótken jaryssóz kezinde Janbolat Mamaiǵa taǵylǵan aiyp tolyq «dáleldendi» degen prokýror: «Jas balasy, kári áke-sheshesi bar ekenin, otbasynyń jalǵyz asyraýshysy ekenin, buryn qylmystyq jaýapqa tartylmaǵanyn eskere otyryp tórt jylǵa bas bostandyǵyn shekteýdi jáne múlkin kámpeskelep, úsh jylǵa deiin jýrnalistik qyzmetpen shuǵyldanýǵa tyiym salýdy» suraǵan.
Buǵan deiin Janbolat Mamai óziniń Muhtar Ábliazovpen qandai da bir bailanysy baryn joqqa shyǵarǵan edi.
2009 jyldan beri Eýropada júrgen, biyl maýsym aiynda Almaty soty tarapynan "bankten aqsha jymqyrdy, qylmystyq top qurdy jáne ony basqardy" degen aiyptarmen syrttai 20 jylǵa sottaǵan Muhtar Ábliazov ta bul aiyptaýdy "absýrd" dep atap, Mamaimen eshqashan kezdespegenin málimdegen.
Al Jaqsylyq Jarymbetov Janbolat Mamaidyń sotynda kýálik etip, jýrnalisti ózine Muhtar Ábliazovtyń syrttai Skype arqyly tanystyrǵanyn, "Mamaiǵa beriletin somany bastapqyda Ábliazovtyń ózi aitqanyn, biraq keiingilerin ózi bergenin" málimdegen.
