Atyshýly biznesmen Qairat Jamalievtyń ótelmegen jaza merzimi ne sebepti aiyppulmen almastyrylǵanyn sot baspasóz qyzmeti túsindirdi.
Budan buryn belgili bolǵandai, Jamaliev 800 myń teńgeden astam aiyppul tólep, bostandyqqa shyqqan.
"Kókshetaý qalalyq sotynyń Jamalievtyń ótelmegen jaza merzimin aiyppulmen almastyrý týraly qaýlysy áleýmettik jeli men BAQ-ta qarama-qaishy pikirler týdyrdy. Jańsaq túsinik qalyptaspaýy úshin osy jait týraly tolyǵyraq aityp bergim keledi", — dep jazdy oblystyq sot baspasóz qyzmetiniń ókili Kúlásh Domalaqova Facebook paraqshasynda.
Ol eske salǵandai, apelliatsiialyq sot 2017 jyly mamyrda Jamalievke qatysty qylmystyq isti qaita qarap, jaza merzimin 13 jyldan 7 jylǵa deiin qysqartty.
Domalaqova Jamalievtyń jaza merzimin aiyppulmen almastyrý týraly ótinishi nelikten Kókshetaý qalalyq sotynda qaralǵanyn da túsindirip ótti. Óitkeni sottalǵan biznesmen biylǵy qańtardan beri Kókshetaýdaǵy ETs-166/24 túrmesinde otyrǵan kórinedi.
Budan bólek, Jamaliev keltirilgen shyǵyndy tolyǵymen ótep, túrmede eshqandai tártip buzýshylyq jasamaǵan, jazasynyń úshten bir bóliginen astamyn ótegen.
"Qylmystyq-atqarýshy júie mekemesinde ózin jaqsy jaǵynan kórsetip, tórt ret yntalandyrý alǵan, ekinshi deńgeili jaǵymdy minez-qulyq tanytyp, mekemeniń mádeni-qoǵamdyq sharalaryna belsene qatysty, sottalǵandardyń erikti uiymy – bos ýaqyt jáne ózin-ózi tárbieleý sektsiialary quramynda bolǵan", — dep jazady Domalaqova.
Sonymen birge, sot Jamalievtyń kámeletke tolmaǵan bes balasynyń baryn jáne jábirlenýshi taraptyń sottan biznesmenniń jazasyn jeńildetýdi suraýyn da eskeripti.
Esterińizge sala ketsek, Qairat Jamaliev 2015 jyly Álibi Jumaǵulovty soqqyǵa jyqqany úshin aiypty dep tanylyp, 13 jylǵa sottalǵan. Jumaǵulovtyń ákesi qylmyskerdi jazalaý úshin halyqqa úndeý tastaǵan soń, bul is qoǵamnyń nazaryna ilikken bolatyn. Keiinirek Jamalievtyń jaza merzimi 7 jylǵa deiin qysqartyldy.
