Ortalyq kommýnikatsiialar qyzmetinde ótken brifingte QR Joǵarǵy Sotynyń azamattyq ister jónindegi sot alqasynyń tóraǵasy N. Sháripov shaǵym jasaýdyń protsessýaldyq tártibi týraly baiandady, dep habarlaidy ortcom.kz saity.
Spikerdiń aitýynsha, Qazaqstanda qoldanylatyn sot isin júrgizýdiń tórt túri boiynsha óndirister qylmystyq protsestik kodekspen, Azamattyq protsestik kodekspen, Ákimshilik rásimdik kodekspen jáne Ákimshilik quqyq buzýshylyq týraly kodekstermen retteledi.
«Sotqa is túsken kezde olardy kompiýter kezdeisoq tańdaý ádisimen sýdialar arasynda avtomatty túrde bóledi. Sot tóraǵalarynyń da, sýdialardyń da naqty isti «kerekti» sýdiaǵa berýge múmkindigi joq. Osy qatań tártip isti odan ári qaraý barysynda, apelliatsiialyq, kassatsiialyq tártipte bolsyn qatań saqtalady. Isterdi, shaǵymdardy men ótinishhattardy, narazylyqtardy qaraý tártibi protsestik kodeksterde naqty belgilengen», - dep túsindirdi spiker.
Birinshiden, isti birinshi instantsiia qaraidy - bul aýdandyq sottar. Shaǵymdanǵan jaǵdaida is apelliatsiialyq satyda qaralady – bul oblystyq sottar. Sodan keiin shaǵym kassatsiialyq satyǵa - Joǵarǵy Sotqa jiberiledi.
«Eger adam kassatsiialyq satynyń sheshimimen kelispese, onda onyń taǵy eki joly bar: narazylyq engizý úshin Bas prokýrorǵa júginý; nemese kassatsiialyq satyda qaita qaraýǵa usynys engizý týraly Joǵarǵy Sottyń Tóraǵasyna júginý. Sot aktilerin qaita qaraýdyń basqa nusqalary joq», - dep atap ótti Sháripov.
