Qazaqstandyq úsh aýtsaider joǵary oqý orny sot sheshimimen jabyldy. Olar – Ortalyq Aziia ýniversiteti, Aqtaý gýmanitarlyq-tehnikalyq ýniversiteti jáne «Astana» ýniversiteti, dep habarlaidy Bilim jáne ǵylym ministrliginiń baspasóz qyzmeti.
Sońǵy jyldary aty atalǵan joǵary oqý oryndary BǴM tapsyrysy boiynsha «Atameken» UKP júrgizetin bilim berý baǵdarlamalarynyń reitinginde únemi tómen pozitsiiadan kórindi. Bul ýniversitetterdegi bilim berý baǵdarlamalarynyń basym bóligi jumys berýshilerdiń talabyna sai kelgen joq jáne bilim alýshylar arasynda da suranysqa ie bolmady.
«Mysaly, Ortalyq Aziia ýniversiteti reitingke 2019 jyly – 36, 2020 jyly – 37, 2021 jyly – 11 bilim berý baǵdarlamasy boiynsha qatysty. Iaǵni kóptegen baǵdarlamalar boiynsha túlekterdiń azdyǵyna bailanysty nátije kórsete almady. Jabylǵan joǵary oqý oryndary sapany jaqsartý baǵytynda jumys istemegen joq, bilim berý baǵdarlamalaryna investitsiia salmady, praktik-mamandardy qyzmetke tartpady. Taldaý nátijesine súiensek, bilim berý baǵdarlamalary boiynsha reitingi tómen joǵary oqý oryndary qaýipti aimaqqa túsetin ýniversitettermen ózara bailanysty bolady. Nátijesinde aýtsaider joǵary oqý oryndary litsenziiasynan aiyrylyp, bilim berý qyzmetin toqtatty», – dep atap ótti QR BǴM Bilim jáne ǵylym salasyndaǵy sapany qamtamasyz etý komitetiniń tóraǵasy Gúlzat Kóbenova.
Dál osyndai jaǵdai «Astana» ýniversiteti men Aqtaý gýmanitarlyq-tehnikalyq ýniversitetinde oryn aldy. Bul joǵary oqý oryndarynyń bilim berý baǵdarlamalarynyń 70-75%-y sapasy boiynsha talaptarǵa jáne jumys berýshilerdiń suranysyna sai bolmady.
«Sonymen qatar qazir basqa joǵary oqý oryndaryn tekserý nátijeleri boiynsha sot protsesteri júrip jatyr. Akademik Á.Qýatbekov atyndaǵy Halyqtar dostyǵy ýniversitetinde pedagogikalyq jáne tehnikalyq baǵyt boiynsha kadr daiarlaý jumys berýshilerdiń talabyna sai kelmeidi. Kadr daiarlaý sapasyn jaqsartý - mańyzdy másele. Eger búgin ýniversitetter tiisti talapqa sai bolmasa, onda erteń biz bilimi men biliktiligi jumys berýshilerdiń suranysyn qanaǵattandyrmaityn mamandardy daiarlaimyz. Biz joǵary oqý oryndaryna olqylyqtardyń ornyn toltyrýǵa ýaqyt beremiz, alaida olar túzetýge asyqpaidy. Osyǵan bailanysty biz qatań shara qoldanamyz. Joǵary oqý oryndary oqytý jaǵdaiyn, bilim berý baǵdarlamalaryn, sonymen qatar stýdentterdiń túrli mamandyqty meńgerý daǵdylaryn jaqsartýǵa jaǵdai jasaýy tiis. Olai bolmasa, joǵary oqý oryndary diplomdardy sapaly bilim bermei-aq úlestiretin bolady», – dep tolyqtyrdy Gúlzat Kóbenova.
Sońǵy 3 jylda jumys berýshilerdiń JOO-lardaǵy bilim berý baǵdarlamalarynyń sapasyn baǵalaýyn taldaý nátijesi jumys berýshiler arasynda maman daiarlaý sapasyna qanaǵattaný kórsetkishiniń óskenin kórsetti. Ýniversitetterdiń bilim berý baǵdarlamalarynyń 85%-y jumys berýshilermen kelisilgen. Qabyldanǵan túzetýlerge sáikes, oqý jylynyń basynan bastap praktik-mamandar tartylady.
BǴM talapkerlerge, stýdentterge jáne olardyń ata-analaryna ýniversitet tańdaǵan kezde sapaǵa nazar aýdarý qajettigin eske salady. JOO reitinginiń nátijelerin QR BǴM jáne «Atameken» QR UKP resmi saittarynan bilýge bolady.
