Almaty oblysynyń Panfilov aýdandyq soty Qytai azamaty, etnikalyq qazaq Sairagúl Saýytbaiǵa alty ai shartty jaza kesip, Qazaqstanda qaldyrý týraly úkim shyǵardy. Sýdia Dinara Quiqabaeva Sairagúl Saýytbaidy Qazaqstan shekarasyn zańsyz kesip ótti dep aiyptap, alty ai merzimge bas bostandyǵynan aiyrý, biraq ony "jazasyn jeńildetetin erekshe jaǵdaiyna" bailanysty shartty jazaǵa almastyrýǵa úkim kesti. Bul týraly Azattyq jazdy.
"Qazaqstan Qylmystyq kodeksiniń 392-baby 1-tarmaǵy boiynsha Sairagúl Saýytbaidy kináli dep taýyp, 6 aiǵa bas bostandyǵynan aiyrý týraly shartty jaza taǵaiyndalsyn. 6 ai merzim probatsiialyq baqylaý merzimi taǵaiyndalsyn. Sot zalynan bosatylsyn" dedi sýdia sheshimdi oqyǵanda.
Sýdia úkim oqyǵan kezinde sot barysynda Sairagúl Saýytbaidyń qylmysty "otbasymen qaýyshý maqsatymen jasaǵany" anyqtalǵanyn, qylmysy "aýyr emes" dep esepteitinin aitty.
Sýdia Sairagúl Saýytbaiǵa jaza taǵaiyndaýda Qazaqstan qol qoiǵan BUU-nyń halyqaralyq Bala quqyqtary jónindegi konventsiiasy basshylyqqa alynǵanyn aitty. Saýytbaidyń etnikalyq qazaq ekeni ári Qazaqstan azamattyǵyn alýǵa quqyǵy bary erekshe jaǵdai retinde eskerilgen.
Úkimnen soń Sairagúl Saýytbai sot zalynan bosatyldy.
Búgin túske deiin sottyń jaryssóz kezeńinde prokýror Arzygúl Imiarova ony Qazaqstan aýmaǵynan shyǵarmaýdy, jazasyn jeńildetip, sot zalynan bosatýdy suraǵan. Prokýror Saýytbaidyń balalary Qazaqstan azamaty ekenin, osy elde turatynyn jáne balalarymen kezdesýin qamtamasyz etý qajettigin aitqan. Ol osyǵan bailanysty ári Saýytbai qylmysyn moiyndaǵandyqtan oǵan Qazaqstannan shyǵarý jazasy qoldanylmaitynyn jetkizgen.
Sot tergeýi kezinde Sairagúl Saýytbai ózine taǵylǵan aiypty tolyq moiyndaitynyn aityp, prokýrormen protsessýaldyq kelisim jasasýdy suraǵan. Ol ózine Qytaida "saiasi qysym jasalǵandyqtan shekaradan zańsyz ótýden ózge jol qalmaǵanyn" málimdegen. Saýytbaidyń sózinshe, ol Qytaida qupiia sanalatyn "saiasi úirený ortalyqtarynda" jumys istegen, "memleket qupiiasyn áshkerelemeý" týraly qolhat bergen. Sairagúl Saýytbai Qytaiǵa qaitarylsa, ol elde ózine ólim jazasy kesilýi múmkin ekenin, Qazaqstanda qandai jazaǵa da kelisetinin málimdegen.
Sairagúl Saýytbaidyń kúieýi Ýáli Islám biyl mamyrda áielin Qazaqstan Ulttyq qaýipsizdik komitetiniń qyzmetkerleri "Qorǵas keden beketin zańsyz buzyp ótti" degen aiyppen ustaǵanyn habarlaǵan.
Sairagúl Saýytbaidyń kúieýi Ýáli Islám men eki balasy Qazaqstan azamattyǵyn alǵan. Erli-zaiypty Ýáli Islám men Sairagúl Saýytbai eki balasymen birge Qazaqstanǵa 2016 jyly kóship kelmek bolǵan.
