Densaýlyq saqtaý ministrliginiń burynǵy basshysy Eljan Birtanov pen onyń orynbasary bolǵan Oljas Ábishev isine qatysty ótken negizgi sot otyrysynda advokattar memlekettik aiyptaýshylar men Densaýlyq saqtaý ministrliginiń ókiline qarsylyq bildirdi, dep habarlaidy QazAqparat.
Qorǵaýshylar tarapynan sóz alǵan Erjan Birtanov zardap shegýshi taraptyń (Densaýlyq saqtaý ministrligi – red.) ókili Asqar Aqbaevqa narazylyq tanytty.
«Birtanovty qorǵaýshy taraptyń Aqbaev myrzaǵa qatysty suraqtary bar. Oǵan kýáger retinde densaýlyq saqtaý salasyn aqparattandyrý platformasy týraly mańyzdy málimeti bar qujatqa qol qoiǵan adam retinde suraq qoiylady. Bul jerde platformanyń 2021 jylǵy 1 qarashadaǵy tehnikalyq jaǵdaiy týraly aktini aityp otyrmyn. Sot is bastalǵanda ol qujatty orys tiline aýdarýǵa jáne zertteýge mindet alǵan. Aqbaev myrza men bul qujatqa qol qoiǵan ózge de tulǵalar, iaǵni Densaýlyq saqtaý ministrligi men Respýblikalyq elektrondy densaýlyq saqtaý ortalyǵynyń, «Erikson Nikola Tesla» kompaniiasynyń ókilderi sotta Birtanovty qorǵaýshy taraptyń suraqtaryna jaýap berýge tiis. Osyǵan bailanysty Aqbaev myrza zardap shegýshi taraptyń ókili retinde sotqa qatysa almaidy. Óitkeni bir adam sot protsesine eki birdei statýspen qatysa almaidy. Ári kýáger, ári zardap shegýshi bolýy múmkin emes. Bul QR Qylmystyq protsessýaldyq kodeksine de, qisynǵa da syimaidy. Mundai qosaqtalǵan statýs múdde qaishylyqtaryn týyndatýy múmkin», - dedi Erjan Birtanov.
Al advokat Serik Saǵaliev protsessýaldyq prokýror Sanat Talqanbaevqa qarsylyq bildirdi.
Oljas Ábishevtiń advokattary da bul ustanymdy qoldaitynyn aityp, memlekettik aiyptaýshylardyń ekeýine de qarsylyq berdi.
Eljan Birtanovtyń ózi de QR Bas prokýrorynan ózine qatysty is boiynsha basqa memlekettik aiyptaýshylar usynýdy surady.
Úzilisten keiin sýdia qorǵaýshy taraptyń talaptaryna qatysty qabyldanǵan sheshimdi málim etti.
«QR Qylmystyq-protsessýaldyq kodeksiniń 87, 88, 94-baptarynyń negizinde sýdia qaýly qabyldady:
- Sottalýshy E.Birtanovtyń qorǵaýshysy Erjan Birtanovtyń zardap shegýshi taraptyń ókili A. Aqbaevty pootsessýaldyq isten shettetip, odan kýáger retinde qorǵaýshy taraptyń jaýap alǵyzýy týraly ótinishinen bas tartý;
- Advokat S. Saǵalievtiń protsessýaldyq prokýrorǵa bergen qarsylyǵynan bas tartý týraly qaýly qabyldady.
Qaýly shaǵymdanýǵa jatpaidy. Qaýlymen kelispeý týraly ýájderdi appeliatsiialyq shaǵymdar men prokýrordyń ótinishine engizýge bolady», - dedi Nur-Sultan qalasynyń №2 Saryarqa aýdandyq sotynyń sýdiasy Ibragim Álkenov.
Aita keteiik, burynǵy densaýlyq saqtaý ministri Eljan Birtanov 2020 jyldyń 3 qarashasynda biýdjet qarajatyn ysyrap etti degen kúdikpen qamaýǵa alynǵan bolatyn.
Tergeý materialy boiynsha, Eljan Birtanov pen orynbasary Oljas Ábishevke «laýazymdyq ókiletin teris paidalaný» arqyly memleketke 1,5 mlrd teńgeniń shyǵyny keltirgeni týraly aiyp taǵylyp otyr.
Al biyl 12 mamyrda sot Eljan Birtanovqa qatysty qylmystyq isti toqtatýdan bas tartqan edi.
