Nur-Sultan qalasynyń mamandandyrylǵan aýdanaralyq tergeý soty burynǵy Densaýlyq saqtaý ministri Eljan Birtanovty úiqamaqta ustaý merzimin uzartty.
Bul týraly Nur-Sultan qalasynyń mamandandyrylǵan aýdanaralyq tergeý soty habarlady.
«2021 jylǵy 21 sáýirde Nur-Sultan qalasynyń mamandandyrylǵan aýdanaralyq tergeý soty E.Birtanovtyń úide qamaýda ustaý merzimin uzartý týraly tergeý organynyń ótinishin qarady. Sotta E.Birtanov oǵan otbasyn asyraý úshin jumys isteýge múmkindik berýdi surady», - dep jazylǵan resmi málimette.
Saitta jazylǵandai, eks-miinistr 6 aidan astam ýaqyt boiy úiden shyqpaǵanyn, osy merzimde qandai da bir zańsyzdyqqa barmaǵanyn alǵa tartqan.
«Zańnyń talaptaryna sáikes, shekteýler adamnyń otbasy múshelerimen qarym-qatynasyna, qorǵaýshymen qarym-qatynasyna, ómirlik mańyzdy áreketterdi júzege asyrýyna, mysaly, meditsinalyq kómek alýǵa jáne t. b. kedergi keltirmeýi kerek. Sot úiqamaq merzimin uzarta otyryp, E.Birtanovqa onyń asyraýynda bes adam, onyń úsheýi jas bala jáne qart ana ekenin eskere otyryp, ómirge qajetti is-áreketterdi júzege asyrý úshin úiden saǵat 8-den 19-ǵa deiin shyǵýǵa ruqsat berdi. Sonymen qatar, sot buǵan deiin Birtanov ózine salynǵan tyiymdy buzbaǵanyn nazarǵa aldy», - dep jazylǵan resmi aqparatta.
Eske salsaq, ótken jyly burynǵy densaýlyq saqtaý ministri Eljan Birtanov qamaýǵa alyndy. Oǵan qatysty asa iri kólemde biýdjet qarajatyn ysyrap etý faktisi boiynsha qylmystyq isti tergelip jatyr.
Sonymen qatar, Densaýlyq saqtaý ministri Aleksei Tsoi burynǵy ministr Birtanovty qoldaǵan ashyq hatqa pikir bildirdi.
