Elorda sotynda eki laýazymdy sheneýnikke – burynǵy densaýlyq saqtaý ministri Eljan Birtanov pen burynǵy vitse-ministr Oljas Ábishevke qatysty qylmystyq is boiynsha aldyn ala tyńdaýdyń jalǵasy boldy, dep habarlaidy Sputnik Qazaqstan.
Burynǵy densaýlyq saqtaý ministri Eljan Birtanov sottan isti Bas prokýratýraǵa qaitarýdy surady. Ol isti tergeý kezinde zań buzýshylyqqa jol berilgenin alǵa tartty.
"Birinshi buzýshylyq – Ericson Nikola Tesla jáne densaýlyq saqtaý ministrliginiń qyzmetkerlerine qatysty isti bólý. Ekinshisi – shyndyqty anyqtaý úshin mańyzdy qujattardy engizýden bas tartý. Úshinshisi – zań talap etetindei istiń barlyq materialymen tolyq tanysýdan bas tartý. Qurmetti sýdia, is boiynsha bizge, aiyptalýshylar men qorǵaýshylarǵa belgisiz jańa 8 tom material paida boldy. Tórtinshisi – atalǵan zań talaptary men bizdiń quqyqtarymyzdy buzyp, isti asyǵys jáne zańsyz sotqa berý", - dedi Eljan Birtanov.
Sotta burynǵy densaýlyq saqtaý ministri Eljan Birtanov 2021 jyldyń qarashasynda qorǵaýshylary birqatar parlament depýtattaryna júgingenin jáne depýtattar Bas prokýror Ǵizat Nurdáýletovke suraý jibergenin, biraq áli jaýap joq ekenin habarlady.
Ekinshi sottalýshy Ábishev aqparattyq platforma jumys istemeitinin málimdedi, óitkeni ol qarjy monitoringi komitetiniń sheshimimen óshirilgen. Onyń aitýynsha, 2018-2019 jyldary ambýlatoriialyq dári-dármekpen qamtamasyz etý aiasynda 60 mlrd teńgeden astam qarajat ońtailandyryldy.
"Platforma biýdjet aqshasyn urlaýdy jalǵastyrý úshin ádeii óshirildi, óitkeni tsifrlandyrý – sybailas jemqorlyqtyń jaýy", – dedi Oljas Ábishev.
Densaýlyq saqtaý ministrliginiń ókili Asqar Aqbaev 2021 jyldyń qazan-qarasha ailarynda ónim berýshi ókilderiniń qatysýymen platformanyń jaǵdaiyna baǵalaý júrgizilgenin, ol platformanyń tolyq kólemde jumys istemeitinin anyqtaǵanyn málimdedi. Onyń aitýynsha, platformany ministrliktiń aqparattyq júielerimen biriktirý iske qosylmaǵan.
Prokýror Baýyrjan Shekenov advokattar men qorǵaýshylardyń dálelderimen kelispei, sottalýshylar ýaqyt sozyp jatyr dep eseptep, sottan is boiynsha basty talqylaýdy surady.
Sondai-aq prokýror Ericson Nikola Tesla kompaniiasynyń laýazymdy tulǵalaryna qatysty qylmystyq kodekstiń 190-baby "Alaiaqtyq" boiynsha sotqa deiingi tergeý bastalǵanyn habarlady. Onyń aitýynsha, bul is Birtanov pen Ábishevtiń kinásin dáleldeýge áser etpeitindikten bólindi.
Sot taraptardy tyńdap, Birtanov pen Ábishevke qatysty qylmystyq isti prokýrorǵa qaitarý týraly qaýly shyǵardy.
"Birtanov pen Ábishevtiń qylmystyq isti prokýrorǵa qaitarý týraly ótinishi qanaǵattandyrylsyn. Birtanovty qylmystyq kodekstiń 361-baby 4-bóligi 2-tarmaǵy jáne 361-baby 3-bóliginde kózdelgen qylmystyq quqyq buzýshylyq jasady dep aiyptaý boiynsha jáne Ábishevtiń qylmystyq kodekstiń 361-babynda 4-bóliginiń 2-tarmaǵynyń kózdelgen qylmystyq quqyq buzýshylyq jasady dep aiyptaýy boiynsha qylmystyq is qylmystyq is júrgizý zańnamasynyń eleýli buzýshylyqtaryn joiý úshin Bas prokýrorǵa qaitarylsyn", - dedi sýdia Ibragim Álkenov.
Sonymen qatar sot Ábishev pen Birtanovtyń úiqamaǵyn bir aiǵa uzartty.
Birtanovqa qandai aiyp taǵyldy?
Eljan Birtanov 2020 jyldyń 25 maýsymynda Qazaqstannyń densaýlyq saqtaý ministri qyzmetinen ketti (bul qyzmetti ol 2017 jyldan beri atqardy).
Burynǵy sheneýniktiń ustalǵany týraly qarashanyń basynda belgili boldy: sol aida Birtanov úi qamaýyna alyndy, ol áli kúnge deiin qamaýda otyr. Bastapqyda Birtanovqa memleket aqshasyn jymqyrdy degen aiyp taǵyldy, alaida sotqa deiingi tergeý aiaqtalǵanǵa deiin bes kún buryn bap "laýazymdyq ókiletin teris paidalaný" dep ózgertildi.
Qarjy monitoringi agenttiginiń pikirinshe, Birtanov patsientter, dári-dármekter jáne meditsinalyq buiymdar týraly barlyq derekti biriktirýge tiis bolǵan jumys istemeitin aqparattyq platformany qabyldap, paidalanýǵa berdi. Qazir platforma jumys istemeidi, al oryndalmaǵan jumystardyń quny 1,5 milliard teńgege baǵalanady.
Budan basqa Birtanovqa ókiletin asyra paidalandy degen taǵy bir aiyp taǵylǵan. Ol 2020 jyldyń maýsymynda Tarazdan Nur-Sultanǵa jetý úshin sanaviatsiia ushaǵyn zańsyz paidalanǵan degen kúdikke ilindi.
Oljas Ábishevtiń isi
Ábishevtiń ustalǵany týraly 2 tamyzda habarlandy. Ol "bilikti asyra paidalandy" degen kúdikke ilindi.
Úshinshi tamyzda Ortalyq kommýnikatsiialar qyzmetinde ótken brifingte sol kezdegi densaýlyq saqtaý ministrliginiń basshysy Aleksei Tsoi Oljas Ábishevtiń óz erkimen jumystan shyǵýǵa ótinish bergenin habarlady. Sodan keiin Ábishevtiń eki aiǵa ustalǵany belgili boldy.
Oljas Ábishev 2018 jyly densaýlyq saqtaý vitse-ministri boldy. Ol tsifrlandyrý jáne aqparattyq qaýipsizdik máselelerine jetekshilik etti.
