Nur-Sultan qalalyq sotynyń qylmystyq ister jónindegi sot alqasy Eljan Birtanovty úiqamaqta ustaý bultartpaý sharasyn kúshinde qaldyrdy, dep habarlaidy "Ult aqparat".
«Búgin Nur-Sultan qalalyq sotynyń qylmystyq ister jónindegi sot alqasy tergeý sotynyń 2021 jylǵy 6 mamyrdaǵy E.Birtanovty úiqamaqta ustaý merzimin 8 aiǵa, iaǵni 2021 jyldyń 14 maýsymyna deiin uzartý týraly sanktsiia berilgen qaýlysyna onyń qorǵaýshylarynyń jeke shaǵymdaryn qarady. Advokattar bultartpaý sharasyn uzartýdan bas tartýdy surady. Sot alqasy tergeý sotynyń qaýlysymen kelisip, ony ózgerissiz qaldyrdy», - delingen Nur-Sultan qalalyq sotynyń baspasóz qyzmeti taratqan aqparatta.
Aita keteiik, sot úiqamaqta otyrǵan E.Birtanovqa onyń asyraýynda bes adam, onyń úsheýi jas bala jáne qart ana ekenin eskere otyryp, ómirge qajetti is-áreketterdi júzege asyrý úshin úiden saǵat 8-den 19-ǵa deiin shyǵýǵa ruqsat bergen edi.
Ótken jyly burynǵy Densaýlyq saqtaý ministri Eljan Birtanov qamaýǵa alyndy. Oǵan qatysty asa iri kólemde biýdjet qarajatyn ysyrap etý faktisi boiynsha qylmystyq isti tergelip jatyr.
