15 qarashada Atyraýdyń №2 soty oblys ákiminiń burynǵy orynbasary Baqytgúl Hamenovaǵa qatysty úkim shyǵardy, - dep habarlaidy Tengrinews.kz.
Burynǵy laýazymdy tulǵa jáne Mádeniet basqarmasynyń basshysy azamat R-ǵa qatysty qylmystyq is aldyn ala sóz bailasyp bir top adammen asa iri mólsherde para aldy degen aiyppen qaraldy (QR QK-nyń 366-baby 3-bóliginiń 2-tarmaǵy). Sondai-aq, aiyptalýshy tarapta laýazymdy tulǵaǵa qomaqty somada para berdi degen aiyppen (QK-nyń 367-baby 2-bóligi) JShS direktory da boldy.
Úkim jariialanǵannan keiin sotta qylmystyq istiń mán-jaiy tanystyryldy. Is materialdarynda 2021 jyldyń qarashasynda Atyraý qalalyq mádeniet bólimi men JShS arasynda 145 000 001 teńgege músin satyp alýǵa kelisimshart jasalǵany kórsetilgen.
"2021 jyldyń 4 qarashasy men 2021 jyldyń 11 qarashasynda tapsyrys berýshi JShS shotyna 72 500 000 teńge somasyndaǵy shart somasynyń jartysy aýdarylǵan. Jaýapker H. (Hamenova -esk.) oblys ákiminiń orynbasary bola tura jáne qurylys salasyna jetekshilik etip, mádeniet basqarmasynyń basshysy R.-ǵa JShS direktorynan bes million teńge kóleminde para talap etýdi tapsyrǵan, al ol kelisken. A. R-ǵa 4,5 million teńge para bergennen keiin olardy Sybailas jemqorlyqqa qarsy qyzmet qyzmetkerleri ustady. Sonymen qatar, R., sotaldy tergeý organdarymen óz erkimen yntymaqtasýǵa niet bildirdi. Kelesi kúni R. alǵan parany H.-ǵa alyp barǵan, ol aqshany alǵan", - delingen Atyraý qalalyq №2 sotynyń baspasóz qyzmeti taratqan habarlamada.
Sot málimetinshe, mán-jailar men sottalýshylardyń kinási R. men A.-nyń tergeý barysynda bergen moiyndaýlary, kýálardyń aiǵaqtary, tintý hattamalary, para berý kezinde sottalýshylardyń arasyndaǵy áńgimeniń jazbalarymen rastalǵan.
Sot Baqytgúl Hamenovaǵa qatysty anttyń buzylýyn aýyrlatatyn mán-jai dep tanydy. Jaýapkershilikti jeńildetetin jaǵdai jas balalardyń bolýy. Sot sheshimi boiynsha, Baqytgúl Hamenova jeti jylǵa bas bostandyǵynan aiyryldy.
"Eki jas balanyń bolýyna bailanysty Qylmystyq kodekstiń 74-baby 1-bóligin qoldanyp, úkimdi oryndaý úsh jylǵa shegerilidi. Sottalýshy R.-ǵa jeti jylǵa, sottalýshy A.-ǵa tórt jylǵa bas bostandyǵynan aiyrý jazasy taǵaiyndaldy. Barlyq aiyptalýshy ómir boiyna memlekettik qyzmette qyzmet atqarý quqyǵynan aiyryldy", - dep isti qaraǵan sýdia sheshimdi jariia etti.
Sot Baqytgúl Hamenovany "Qurmet" ordeninen aiyrý týraly Prezidentke usynys jasady. Sottyń úkimi zańdy kúshine engen joq.
