Foto: azattyq.org alyndy
Aqtaýdaǵy ushaq apaty aýmaǵyn dronǵa túsirgen aqtaýlyq bloger Azamat Sársenbaev 10 kúnge qamaldy, - dep habarlaidy ult.kz Azattyq radiosyna silteme jasap.
Sot sheshiminde Sársenbaevtyń politsiianyń talabyna qaramastan apat aýmaǵyn dron jáne telefonyna túsirgeni (“politsiianyń zańdy talabyna baǵynbaý” 667-bap, 1-bólik) jazylǵan.
Sot protsesi kezinde bloger ózine taǵylǵan aiyppen kelispei, BBC jáne Reuters-tegi áriptesteriniń ótinishimen aýmaqty túsirgenin, politsiianyń jumysyna kedergi keltirmegenin aitqan.
Sot sheshimi áli kúshine enbegen. Advokat sheshimdi apelliatsiiaǵa beretinin málimdedi.
Bir kún buryn Bakýdan Groznyiǵa qarai ushqan Azerbaijan Airlines áýe kompaniiasyna tiesili Embraer-190 ushaǵy Aqtaý mańynda apatqa ushyraǵan. Ushaq bortynda 67 adam boldy: ekipajdyń bes múshesinen bólek, Ázerbaijannyń – 37 azamaty, Reseidiń - 16, Qazaqstannyń - 6, Qyrǵyzstannyń 3 azamaty bolǵan.
Áýe apatynan 38 adam qaza boldy, 29 adam tiri qalǵan. Olar Aqtaýdaǵy aýrýhanaǵa jatqyzylǵan, jeti adamnyń jaǵdaiy óte aýyr ekeni habarlandy. Tiri qalǵandar arasynda qazaqstandyqtar joq.
Apatqa bailanysty qylmystyq is qozǵalǵan, úkimet komissiiasy qurylǵan. Apat sebebine bailanysty ázirge, tek boljamdar aitylyp jatyr.
Apat aýmaǵynan aqparat taratqan Azamat Sársenbaevtyń kóp keshikpei ustalǵany belgili bolǵan edi.
