Aqtóbe oblysynda qańtar aiynda 52 jolaýshysy órtenip ketken avtobýs júrgizýshilerin qamaý merzimi taǵy bir aiǵa uzartyldy. Bul jóninde "Astana" arnasy oblystyq sottyń baspasóz qyzmetine silteme jasap habarlady.
"Aqtóbe qalasy nómiri ekinshi sotynyń 2018 jyldyń 21 sáýirdegi qaýlysymen Qyrǵyzbaevqa, Tańatovqa, Pernebekovke qatysty "kúzetpen ustaý" túrindegi bultartpaý sharasy 24 mamyrǵa deiin uzartyldy. Qaýly zańdy kúshine engen joq", — dedi oblystyq sottyń baspasóz qyzmetiniń jetekshisi Anar Aitjanova.
Jantúrshigerlik oqiǵa 18 qańtar kúni Yrǵyz aýdanynda bolǵan edi. Shymkentten Qazan qalasyna bara jatqan avtobýs órtenip, ondaǵy 55 adamnyń 52-si qaza tapty. Olardyń barlyǵy Ózbekstan azamaty.
Órt salondy jylytý úshin dánekerleýshi lampany qoldanǵannan bolǵan. Al qańtar aiynyń sońynda avtobýstyń aman qalǵan úsh júrgizýshisine abaisyzda eki nemese odan da kóp adamnyń ólimine ákep soqqan is-áreketke bardy degen aiyp taǵylyp, qamaýǵa alynǵan bolatyn. Olardy qamaqta ustaý merzimi osymen ekinshi márte uzartylyp otyr. Tergeý jalǵasyp jatyr.
