Bishkektegi "Ala-Archa" rezidentsiiasynda Qyrǵyzstannyń jańadan sailanǵan prezidenti Sooronbai Jeenbekovtiń ulyqtaý saltanaty ótip jatyr. Saltanatty sharada Sooronbai Jeenbekovke Qyrǵyzstan Ortalyq sailaý komissiiasynyń tóraiymy Nurjan Shaildabekova prezident kýáligi men tósbelgisin tapsyrdy.
Budan soń Jeenbekov el konstitýtsiiasyna qolyn qoiyp, ant qabyldady. Jeenbekov qyzmetine kirisip jatyp, "Qudaidyń jáne elimniń aldynda memleket basshysynyń ókilettilikterin ádiletti túrde iske asyrýǵa, adam jáne azamat quqyqtaryn, Qyrǵyz Respýblikasynyń Konstitýtsiiasyn qorǵaýǵa jáne memleketimizdiń tutastyǵy men qaýipsizdigin saqtaýǵa ant beremin", - dedi.
Azattyqtyń Qyrǵyz redaktsiiasynyń habarlaýynsha, saltanatty sharaǵa depýtattar, ministrler, shetel elshileri, halyqaralyq uiymdardyń ókilderi - barlyǵy 450 adam qatysyp jatyr. Ulyqtaý saltanatyna shet melmeketter basshylary shaqyrylmaǵan.
Buǵan deiin Qyrǵyzstan premer-ministri bolǵan Sooronbai Jeenbekov qyzmetinen ketken prezident Almazbek Atambaev jetekshilik etetin Sotsial-demokratiialyq partiiasy atynan sailaýǵa túsip, 54 paiyz daýyspen jeńip shyqqan.
