Qyrǵyz Respýblikasynyń Prezidenti Sooronbai Jeenbekov eldegi qalyptasqan jaǵdaiǵa bailanysty qyrǵyzstandyqtarǵa taǵy da úndeý jasap, saiasi dialogqa daiyn ekendigi týraly málimdedi, dep habarlaidy "Ult aqparat" Qyrǵyz Prezidentiniń baspasóz qyzmetine silteme jasap.
Sooronbai Jeenbekov óziniń kezekti úndeýinde keibir saiasi kúshterdiń áreketi saldarynan sońǵy úsh kúnde elde saiasi daǵdarys bastalǵanyn aitty.
«Barlyq qyrǵyzstandyqtar saiasi aýyr jaǵdaidy bastarynan ótkizýde. Men osy jaǵdaidy retteý týraly sizderdiń talaptaryńyzdy tolyq túsinemin. Men Prezident retinde daǵdarystyq máselelerdi sheshý baǵyttarynda barlyq kúsh-jigerimdi salatyn bolamyn. Osy maqsatta túrli saiasi kúshtermen jeke kelissózder ótkizemin. Aita keteiin, qazirge deiin jaǵdaidy retteý úshin bir de bir tarap kelissózder júrgizetin biryńǵai alań usynǵan joq. Sondai-aq, túrli laýazymdy tulǵalardy qyzmetten bosatý jáne taǵaiyndaý protsesin zańdastyrý qajet», delingen Sooronbai Jeenbekovtiń kezekti úndeýinde.
Eske salaiyq, jeksenbi, 4 qazan kúni Qyrǵyzstanda Jogorký Keneshke depýtattardy sailaý ótti. Depýtattyq mandatqa 16 partiia úmitkerlik etti. Daýys berýdiń aldyn ala málimeti boiynshy, 7% mejeni 4 partiia eńserdi.
Al, 5 qazan kúni sailaý nátijesine kóńili tolmaǵan bir top adam ortalyq alańda miting uiymdastyryp, odan keiin Aq úige bettedi. Olardy tarqatý úshin militsiia kóz jasaýratatyn gaz, sýatqysh jáne gaz-shýyldy qurylǵylar qoldanǵan. Bishkek ýaqytymen saǵat 22.00-degi málim boiynsha, aýrýhanaǵa zardap shekken 16 adam jetkizilgen. Keiingi málimet boiynsha, zardap shekken adamdar sany 911-ge jetti.
Eldiń Ishki ister ministrligi mitingti uiymdastyrýshylar men partiia basshylaryn óz jaqtastaryn úilerine qaitarýǵa shaqyrdy.
6 qazanda Qyrǵyz Respýblikasynyń Prezidenti Sooronbai Jeenbekov eldegi saiasi jaǵdaiǵa bailanysty málimdeme jasady.
