Foto: Májilis
Búgin, 2 qyrkúiekte kanikýldan oralǵan depýtattar Parlament palatalarynyń birlesken otyrysyn ótkizdi. Depýtattar 2 ai boiy óńirlerdi aralap, sailaýshylarmen kezdesti. El-jurttyń bilikke saýaldary men usynystaryn óz aýzynan estip, óńirlerdegi shynaiy jaǵdaidy kózderimen kórip qaitty, dep habarlaidy Ult.kz.
Óńirlerdi aralap kelgen depýtat Ermurat Bapidan jýrnalister halyqtyń turmys jaǵdaiyn surap, qymbatshylyq qalai áser etip jatqanyn surady.
"Sonshalyqty bir qinalǵan halyqty kórmedim. Árine áńgime bar ol jerde. Qymbatshylyq qai jerde bolsyn bar. Biraq jalpy meniń ózim Shyǵysta boldym, Semeide, Almaty oblysy jáne basqa da biraq jerde boldym. Qatty bir qiynshylyqqa tap boldy degen halyq kórgen joqpyn. Biraq birinshi qyrkúiekke balalaryna kiim ala almai otyrǵan jekelegen otbasylar bar eken. Olarǵa kómek kórsetý úiin azdy-kópti áreketter jasadyq", ‒ dedi E. Bapi.
Sonymen qatar depýtat ár óńirdiń óz máselesi bar ekenin aitty.
"Mysaly Zaisanda gaz máselesi, Katonqaraǵaida áli kúnge deiin salynyp bitpegen jol máselesi bar. Sol siiaqty ár jerdiń óz taqyryby bar. Olardyń árqaisysyn jipke tizgendei aityp otyrý múmkin emes", ‒ dedi májilismen.
VIII sailanǵan Parlamenttiń tórtinshi sessiiasy jumysyn resmi bastady. Ermurat Bapi aldaǵy ýaqytta qandai zań qaralatynyn aityp, birneshe ózekti máselelerdi jetkizdi.
"Qazirgi júrgip jatqan qurylys kodeksi eń úlken másele bolady. Óitkeni eldegi ekonomikanyń negizgi sektory, negizgi draiveri ‒ qurylys. Odan keiin tsifrlandyrýǵa bailanysty kóp másele bar. Tsifrlandyrý ‒ eldegi jemqorlyqty joiýdyń birinshi quraly retinde qazir qaralyp jatyr. Ol turǵydan kelgende zańǵa tolyqtyrýlar, ózgertýler, jalpy osy zańdy kúsheitý máselesi turǵysynda depýtattar tarapynan naqty usynystar bolady dep oilaimyn", ‒ deidi depýtat.
Májilismen E. Bapi qorǵanys salasyna bailanysty naqty usynys daiyndaǵan eken. Onyń ishinde áskerge shaqyrtýǵa bailanysty zańǵa tolyqtyrýlar men ózgertýler engizý boiynsha naqty usynys daiyndapty.
Al depýtat Aidos Sarym jemqorlyq týraly zań jobasyn daiyndaǵanyn aitady. Budan bólek engizeiin dep jatqan shekaralyq aimaqtar týraly zań jobasyn atady. Sondai-aq taǵy qandai jumys atqaratynyn depýtat tilshimizge baiandap berdi.
"Meditsinalyq saqtandyrý boiynsha men aldynǵy apta jumys istedim. Qarjy naryǵyn baqylaý jónindegi agenttiktiń ókilderimen, qarjy naryǵynyń azamattarymen kezdesip, usynystarymyzdy bereiik dep jatyrmyz", ‒ degen depýtat Aidos Sarym da áskeri salaǵa qatysty zańdy “eń úlken máseleniń biri” dep atady.
Aidos Sarymnyń sózinshe sońǵy bir jyl ishinde armiiaǵa qatysty kóptegen qurylymdyq zań qabyldandy. Depýtattyń oiymsha armiianyń bedelin, armiiada eńbek etýdiń abyroiyn arttyratyn áleýmettik normalar qajet.
"Olardyń kóbi 2017-2018 jyldary kúiip ketken. Sovet zamanyndaǵydai bolmas, biraq shyn mánide armiiada eńbek etý, otanǵa qyzmet etý abyroily, ózin ózi aqtaityn, otbasyn qamtamasyz ete alatyn dúnie kerek. Búgin bir qýanǵanym, ótkende bizde Zabigýlin deitin órt sóndirýshi qaitys bolǵan edi ǵoi, sonyń áriptesteri balalaryn qolynan jetektep, mektepke aparypty. Iaǵni otan úshin kúiem, otqa túsemin dep barǵan adamdardyń ishki senimi bolýy kerek. Bul meniń otanym, bala-shaǵam, áke-sheshem, otbasym dalada qalmaidy, otanym bar, olardy qorǵaidy degen printsip engizý kerek. Biraq barynsha atqaryp jatyrmyz. Biraq kóptegen másele qarjyǵa tireledi. Mysaly úshin Almatyda júrgende kóp áskeri bólimdermen keziktik. Áli kúnge deiin jalaqysyna, tólemderine, turǵyn úi máselesine kóńilderi tolmaityny anyq", ‒ dedi A. Sarym.
