QR Premer-Ministri Baqytjan Saǵyntaevtyń tóraǵalyǵymen ótken Úkimet otyrysynda ónerkásiptik qaýipsizdikti qamtamasyz etý máseleleri qaraldy, dep habarlaidy "Ult aqparat" Úkimet basshysynyń baspasóz qyzmetine silteme jasap.
Investitsiialar jáne damý ministri Jeńis Qasymbek ónerkásiptik qaýipsizdik salasyndaǵy memlekettik saiasatty iske asyrý barysy týraly málimdedi.
«Sońǵy jyldary jasalǵan ahýaldyq taldaý qaýipti óndiristik nysandardyń apatsyz jumysy oń qarqynǵa ie ekenin kórsetti. Máselen, 2016 jyly apattar sany 2008 jylmen salystyrǵanda 60%-ǵa tómendegen, apat saldarynan zardap shekkender sany shamamen tórt esege qysqarǵan», — dedi Jeńis Qasymbek.
Ministrdiń aitýynsha, jazataiym oqiǵalar sanyn azaitýdyń negizgi sebepteri — ónerkásiptik qaýipsizdik salasynda qaýipti baǵalaý júiesin engizý, ónerkásiptik qaýipsizdik salasyndaǵy normativtik-quqyqtyq bazany jetildirý, ýákiletti organ men baqylanatyn kásiporyndar arasyndaǵy syndarly ózara is-qimyl jasaý arqyly apattardyń aldyn alý jáne oǵan jol bermeý jumystaryn kúsheitý.
Sonymen qatar, ministr jabdyqtardyń, ǵimarattar men qurylystardyń eskirýi, sondai-aq qaýipti óndiristik nysan ieleriniń ónerkásiptik qaýipsizdik talaptaryn saqtamaýy óndiristik qaýipsizdik jaǵdaiyna teris áserin tigizetinine nazar aýdardy. Osyǵan bailanysty, vedomstvo ónerkásiptik kásiporyndardy óndiristi jańǵyrtý men avtomattandyrýǵa yntalandyrý boiynsha jumystar júrgizip jatyr.
«Qazirdiń ózinde ERG, KazZinc sekildi kásiporyndar «aqyldy karer», qyzmetkerlerdi mobildi basqarý, «aqyldy fabrika» sekildi Indýstriia 4.0 elementterin engizý boiynsha jumystar júrgizip jatyr. KazMinerals kásiporyndarynda (Aqtoǵai jáne Bozshakól) óndiristi dispetcherleý men ońtailandyrý júiesi engizilgen. «Altyntaý Kókshetaý» AQ-da onlain rejimde karerge monitoring júrgizý jáne ónerkásiptik internet júiesi engizilgen. Júiequrýshy kásiporyndardyń kóptegen kenishterinde qyzmetkerlerdi qulaqtandyrý jáne jaiǵastyrý júieleri iske asyrylǵan. Óńdeý ónerkásibinde «SaryarqaAvtoÓnerkásip» JShS, «Jigermunaiservis» JShS, «Qainar-AKB» JShS sekildi keibir kásiporyndarda robottalǵan derbes keshender qoldanylýda», — dedi investitsiialar jáne damý ministri.
Budan ózge, qazirgi zamanǵy normalar men halyqaralyq tehnologiialyq talaptarǵa sáikes normativtik-quqyqtyq bazany jetildirý maqsatynda «QR keibir zańnamalyq aktilerine ónerkásiptik qaýipsizdik máseleleri boiynsha ózgerister men tolyqtyrýlar engizý týraly» zań jobasynyń tujyrymdamasy ázirlenip jatyr.
Sonymen qatar, Elbasynyń memlekettik baqylaý jáne qadaǵalaý fýnktsiialarynyń aýqymdy tekserisin júrgizý týraly tapsyrmasyna sáikes ónerkásiptik qaýipsizdik salasyndaǵy fýnktsiialardyń 30% qysqartylady.
Qorytyndylai kele, baiandamashy atalǵan mindetterdi júzege asyrý qazaqstandyqtardyń ómiri men densaýlyǵyn saqtai otyryp, qaýipti óndiristik nysandardyń apatty jaǵdailaryn tómendetýge múmkindik beretinin aitty.
.jpeg)