Foto: Aqorda
Memleket basshysy «Ortalyq Aziia – AQSh» sammitine qatysty, dep habarlaidy Ult.kz Aqordanyń baspasóz qyzmetine silteme jasap.
Qasym-Jomart Toqaev Aq úide tarihi kezdesý uiymdastyrǵany úshin AQSh Prezidentine alǵys aityp, S5+1 formatyndaǵy sammit shyn máninde Ortalyq Aziia men Qurama Shtattar arasyndaǵy yntymaqtastyqtyń jańa kezeńine jol ashqanyna nazar aýdardy.
Memleket basshysy AQSh Prezidenti Donald Tramptyń halyqaralyq saiasattaǵy róline airyqsha toqtalyp, ony kórnekti memleket qairatkeri dep baǵalady.
– Siz júrgizip otyrǵan parasatty jáne batyl saiasatty búkil álem qoldaýǵa laiyq dep sanaimyn. Men de Sizdiń ustanymdaryńyzdy qýattaimyn. Sizdiń jetekshiligińizben Amerika altyn dáýirge qadam basty. Biz «Amerikany qaitadan uly elge ainaldyrý» (Making America Great Again) dep atalatyn kóregen tujyrymdamańyzdy joǵary baǵalaimyz. Bul maqsat «Zań jáne tártip» qaǵidatyna negizdelgen Ádiletti, Qýatty Qazaqstan qurýdy kózdeitin aýqymdy strategiiamyzben úndesedi. Bitimger Prezident retinde segiz aidyń ishinde segiz soǵystyń toqtaýyna yqpal ettińiz. Osylaisha, Amerikanyń halyqaralyq turaqtylyqqa tirek bolǵan rólin aitarlyqtai kúsheite tústińiz, – dedi Qasym-Jomart Toqaev.
Prezident Qazaqstannyń Qurama Shtattarmen strategiialyq seriktestikti odan ári nyǵaitýǵa nietti ekenin rastady.
– Qazaqstan men AQSh arasyndaǵy san qyrly yntymaqtastyqty damytýdy udaiy qoldap kelesiz. Men muny joǵary baǵalaimyn. Aq úide Prezident laýazymyn atqarǵan alǵashqy kezeńde bizdiń qarym-qatynasymyz keńeitilgen strategiialyq seriktestik deńgeiinde zańnamalyq turǵydan bekidi. AQSh – Qazaqstanǵa 100 milliard dollardan asa qarjy salǵan eń iri investorymyz, ekonomikamyzdyń qozǵaýshy kúshi sanalady. Sońǵy jyldary elderimiz arasyndaǵy taýar ainalymy eki ese ósip, 5 milliard dollar mejesine jýyqtady. Amerikadaǵy ýranǵa suranystyń shamamen 25 paiyzyn qamtamasyz etip otyrmyz. Qazaqstanda 600-den astam amerikalyq kompaniia biznes júrgizedi, – dedi Memleket basshysy.
Qasym-Jomart Toqaev sapar aiasynda eki el kompaniialary jalpy somasy 17 milliard dollardan asatyn kelisimder jasasqanyn aitty.
Jalpy, Qazaqstan men AQSh-tyń energetika, asa mańyzdy mineraldar, ónerkásip, kólik, qarjy, jasandy intellekt, bilim sekildi negizgi salalardy qamtityn ekonomikalyq áleýeti jarty trillion dollardan asady.
Prezident amerikalyq kompaniialardy elimizde investorlar úshin jasalǵan ońtaily jaǵdaidy paidalanýǵa shaqyrdy. Tipti, olarǵa ózi qoldaý kórsetinin jetkizdi.
