Ekonomikanyń bazalyq salalarynda jumys berýshiler eńbek úshin ústeme jumysqa eki ese joǵary kólemde tólep jatyr. Bul týraly QR Eńbek jáne halyqty áleýmettik qorǵaý ministri Tamara Dúisenova Májilistegi Úkimet saǵatynda málim etti, dep habarlaidy Ult.kz tilshisi QazAqparat agenttigine silteme jasap.
«Búginde eń tómengi eńbekaqyny belgileý rásimin qurý týraly Qazaqstan ratifikatsiialaǵan Halyqaralyq eńbek uiymy konventsiiasynyń erejesin júzege asyrýdamyz. Jalaqyny tómen mólsherde alatyn jumysshylardyń sanyna júieli túrde monitoring júrgizilýde. Monitoring nátijesi boiynsha sońǵy bes jylda eń tómengi deńgeide eńbekaqy alatyn adamdardyń sany 30 paiyzǵa azaidy. Eńbekti tóleýdiń eń tómengi standarttary mólsheri boiynsha túngi ýaqyttaǵy, demalys jáne meiram kúnderdegi jumys aiasynda Eńbek kodeksin ázirleý men talqylaý barysynda kóp pikir aitylǵan bolatyn. Ujymdyq sharttar men ekonomikanyń bazalyq salalaryndaǵy kásiporyndarda eńbekti tóleý júiesine jasalǵan monitoring áleýmettik dialogtyń qisyndylyǵyn kórsetti. Búginde olar atalǵan tólemdi eki ese joǵary kólemde belgilegen. Al jumysshynyń ailyq eńbekaqysy mólsherine toqtalsaq, ony jumys berýshiler qyzmetkeriniń biliktiligine qarai, sondai-aq oryndalatyn jumystyń qiyndyǵyn, kólemin ári sapasyn eskere otyryp belgileidi. Osy talaptar aiasynda 2016 jyldyń 1 qańtarynan bastap azamattyq qyzmetshilerdiń eńbegin tóleýdiń jańa modeli engizilip, onyń nátijesinde olardyń jalaqysy ortasha alǵanda 30 paiyzǵa joǵarylady»,-dedi T. Dúisenova Májilistegi Úkimet saǵatynda.
Budan bólek, ministr Eńbek kodeksiniń jańa modelin iske asyrýdyń negizgi qorytyndylaryn atady. Eki jylda eńbekti qorǵaý men qaýipsizdik boiynsha qoldanystaǵy 430 standartqa inventarizatsiia júrgizilip, ońtailandyrýǵa jatatyn standarttardyń tizimi aiqyndaldy. Qaita qaraý nátijesinde, 122 eńbek standarty men 11 eńbekti qorǵaý jáne qaýipsizdik standarty jańa normalarǵa sáikes keltirildi. Eńbek standarttaryn jańartý boiynsha jumys 2021 jylǵa qarai aiaqtalmaq.
.jpeg)