Dimash Qudaibergen qazaqstandyq mánerlep syrǵanaýshy Denis Tenniń jaqyndaryna kóńil aitty, dep habarlaidy "Ult aqparat".
"Osy posty jazamyn dep eshqashan oilamappyn... Buǵan sene almai otyrmyn. Denis, meniń baýyrym, dosym. Seniń ornyń árdaiym oisyrap turady… Dostyǵyń úshin rahmet, Djeki! Sen - uly adamsyń, uly!!! Sen ańyz bolyp qaldyń! Ómirden erte ótkeniń qandai ókinishti… Men únemi seni maqtan tutatyn bolamyn, saǵynatyn bolamyn! Sen - bar ǵumyryn eliniń bedelin kóterýge arnaǵan batyrsyń! Barlyǵy úshin rahmet! Buǵan sengim kelmeidi… Sene almaimyn… Bizdiń sońǵy áńgimemizdi eshqashan umytpaimyn. Jatqan jeriń jaily bolsyn…! Týystary men jaqyndaryna kóńil aitamyn. Qaskóiler jazasyz qalmaidy…", — dep jazdy ánshi instagramdaǵy paraqshasynda.
Eske sala ketsek, beisenbi kúni Almatyda tanymal mánerlep syrǵanaýshy Denis Tendi pyshaqtap ketkeni habarlandy.
Qalalyq IID baspasóz qyzmetiniń habarlaýynsha, oqiǵa Qurmanǵazy Baiseiitova kósheleriniń qiylysynda túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn. 2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
