KHDR senbi tańynda Shyǵys teńizge taǵy da belgisiz snariadtar ushyrdy, dep habarlaidy Yonhap agenttigi.
Shtab bastyqtary birikken komitetiniń málimdemesine qaraǵanda, zymyrandar Ońtústik Hamgiong provintsiiasynyń Hamhýng qalasynan ushyrylǵan. Budan basqa aqparat joq.
«Biz ár jaǵdaiǵa daiyn bola otyryp, endigi zymyrandardyń ushyrylýyn úzbei ańdyp otyrmyz», - delingen Komitettiń málimdemesinde.
Osydan tórt kún buryn, KHDR Shyǵys teńizde taǵy eki zymyran ushyrdy. Olar jaqyn qashyqtyqqa atylatyn KN-23 ballistikalyq zymyrandary bolýy ábden múmkin.
Phenian jarty aidyń ishinde osymen besinshi márte zymyran ushyrdy. Zymyrandardyń alǵashqy legi 25 shilde kúni ushyrylǵan.
Phenian Ońtústik Koreia men AQSh arasynda ótip jatqan birlesken áskeri oqý-jattyǵýlarǵa osylai narazylyq tanytyp otyr, dep jazdy Yonhap.
Seýl men Vashington birikken jazǵy áskeri jattyǵýlardy dúisenbi kúni bastady. KHDR muny shabýyl jasaýdyń daiyndyǵy dep sanap, ony toqtatýdy talap etip otyr.
Donald Tramp Aq úide ótken jýrnalistermen kezdesýde KHDR basshysymen taǵy da kezdesýi múmkindigin bildirdi. Budan bólek, Tramp ushyrylǵan zymyrandardyń ballistikalyq zymyran emes ekendigin aitty. «Sońǵy ushyrylǵandardyń barlyǵy – jaqyn qashyqtyqqa atylatyn snariadtar. Olar ballistikalyq zymyran ushyrǵan joq», - dedi Tramp.
