كحدر سەنبٸ تاڭىندا شىعىس تەڭٸزگە تاعى دا بەلگٸسٸز سناريادتار ۇشىردى, دەپ حابارلايدى Yonhap اگەنتتٸگٸ.
شتاب باستىقتارى بٸرٸككەن كوميتەتٸنٸڭ مەلٸمدەمەسٸنە قاراعاندا, زىمىراندار وڭتٷستٸك حامگيونگ پروۆينتسيياسىنىڭ حامحۋنگ قالاسىنان ۇشىرىلعان. بۇدان باسقا اقپارات جوق.
«بٸز ەر جاعدايعا دايىن بولا وتىرىپ, ەندٸگٸ زىمىرانداردىڭ ۇشىرىلۋىن ٷزبەي اڭدىپ وتىرمىز», - دەلٸنگەن كوميتەتتٸڭ مەلٸمدەمەسٸندە.
وسىدان تٶرت كٷن بۇرىن, كحدر شىعىس تەڭٸزدە تاعى ەكٸ زىمىران ۇشىردى. ولار جاقىن قاشىقتىققا اتىلاتىن KN-23 بالليستيكالىق زىمىراندارى بولۋى ەبدەن مٷمكٸن.
پحەنيان جارتى ايدىڭ ٸشٸندە وسىمەن بەسٸنشٸ مەرتە زىمىران ۇشىردى. زىمىرانداردىڭ العاشقى لەگٸ 25 شٸلدە كٷنٸ ۇشىرىلعان.
پحەنيان وڭتٷستٸك كورەيا مەن اقش اراسىندا ٶتٸپ جاتقان بٸرلەسكەن ەسكەري وقۋ-جاتتىعۋلارعا وسىلاي نارازىلىق تانىتىپ وتىر, دەپ جازدى Yonhap.
سەۋل مەن ۆاشينگتون بٸرٸككەن جازعى ەسكەري جاتتىعۋلاردى دٷيسەنبٸ كٷنٸ باستادى. كحدر مۇنى شابۋىل جاساۋدىڭ دايىندىعى دەپ ساناپ, ونى توقتاتۋدى تالاپ ەتٸپ وتىر.
دونالد ترامپ اق ٷيدە ٶتكەن جۋرناليستەرمەن كەزدەسۋدە كحدر باسشىسىمەن تاعى دا كەزدەسۋٸ مٷمكٸندٸگٸن بٸلدٸردٸ. بۇدان بٶلەك, ترامپ ۇشىرىلعان زىمىرانداردىڭ بالليستيكالىق زىمىران ەمەس ەكەندٸگٸن ايتتى. «سوڭعى ۇشىرىلعانداردىڭ بارلىعى – جاقىن قاشىقتىققا اتىلاتىن سناريادتار. ولار بالليستيكالىق زىمىران ۇشىرعان جوق», - دەدٸ ترامپ.
