Foto: ashyq derekkóz
Petropavl qalasynyń turǵyny, kámeletke tolmaǵan úsh balany tárbielep otyrǵan jalǵyz basty ana birneshe jyl boiy baspana kezeginde turǵanymen, oǵan tiisti turǵyn úi berilmegen. Atalǵan jaǵdai boiynsha turǵyn sotqa júginip, ádildikke qol jetkizdi, dep habarlaidy Ult.kz.
2007 jyldan beri «memlekettik qyzmetker» sanaty boiynsha baspanaǵa muqtaj retinde esepte turǵan áielge ata-anasy qaitys bolǵan soń, Olshanka aýylyndaǵy jalpy aýdany 20,2 sharshy metr (onyń ishinde turǵyn úi alańy – 10,5 sharshy metr) bolatyn úidiń tórtten bir bóligi muraǵa qalǵan. 2023 jyly ol atalǵan úlesin kórshisine syiǵa tartý shartymen bergen.
Bir jyldan keiin áielge Petropavl qalasynan turǵyn úi kezekte turǵandardy nesielendirý baǵdarlamasy boiynsha páter berilgen. Alaida turǵyn úi-kommýnaldyq sharýashylyq bólimi buǵan kelisim bermei, áielmen satyp alý-satý shartyn jasaýdan bas tartty. Olar buryn ielikten shyǵarylǵan úidi «turýǵa jaramdy» dep eseptep, «Turǵyn úi qatynastary týraly» Zańnyń 72-baby 2-tarmaǵyn alǵa tartqan.
Sot barysynda muragerlik jolmen qalǵan turǵyn úidiń sanitarlyq jáne tehnikalyq talaptarǵa sáikes kelmeitini anyqtaldy. Onyń ústine jalpy turǵyn úi alańy – bar-joǵy 10,5 sharshy metr, al qoldanystaǵy zańnama boiynsha bir adamǵa keminde 15 sharshy metrden kelýi tiis. Buǵan qosa, jergilikti atqarýshy organ otbasy quramynda ártúrli jynystaǵy balalardyń bar ekenin eskermegen, bul olardyń jeke bólmemen qamtamasyz etilýin talap etedi.
Sot áieldiń talaptaryn oryndy dep tanyp, turǵyn úi-kommýnaldyq sharýashylyq bólimin onymen satyp alý-satý shartyn jasasýǵa mindettedi. Sheshim zańdy kúshine endi.
