© Photo : pixabay.com
Soltústik Qazaqstan oblysynda jańa jyldyń alǵashqy kúninde eki er adam órtten qaza tapty. Olardyń biri tósekte temeki shekse, ekinshisi peshti benzinmen jaqqan, dep habarlaidy Sputnik Qazaqstan.
Oblystyq tótenshe jaǵdailar departamenti basshysynyń orynbasary, azamattyq qorǵanys polkovnigi Dmitrii Rastihinniń dereginshe, jańa 2023 jyldyń basynan beri Soltústik Qazaqstan oblysynyń aýmaǵynda segiz órt oqiǵasy tirkelip, órt kezinde eki adam qaza tapqan.
"1 qańtarda tańǵy ýaqytta Qyzyljar aýdany Beskól aýylynda jeke turǵyn úiden órt shyǵyp, órt ornynan 1977 jyly týǵan er adamnyń máiiti tabyldy. Aldyn ala boljam boiynsha er adam tósekte temeki shekken", - dedi Rastihin.
Dál osy kúni keshki saǵat 20:00 shamasynda Petropavlda Rabochii aýylynda jeke turǵyn úiden órt shyǵyp, 1989 jyly týǵan er adam qaitys boldy.
"Kýágerlerdiń aitýynsha, er adam dosymen birge pesh jaǵý úshin benzin qoldanyp, ol tutanyp ketken. Sonyń saldarynan bir adam aman qalyp, ekinshisi qaitys boldy. Boljam boiynsha kóz jumǵan eki azamat ta mas bolǵan. Sot-meditsinalyq saraptama taǵaiyndaldy", - dedi Dmitrii Rastihin.
Órt sóndirýshiler jańa jyldyq merekeler kezinde alkogoldi ishimdikterdi tutyný saldarynan pirotehnikalyq buiymdardy abaisyz paidalaný, peshterdi, gazdaǵy tamaqty qaraýsyz qaldyrý jaǵdaiy arta túsetinin aitty.
2022 jyly Soltústik Qazaqstan oblysynyń aýmaǵynda 695 órt tirkeldi, onyń saldarynan 38 adam qaza taýyp, 30 adam dene jaraqatyn alǵan.
