Foto: QR ǴJBM
Soltústik Qazaqstan oblysynyń turǵyny balyq aýlaý kezinde tarihi oljaǵa tap boldy, dep habarlaidy Ult.kz.
Áset Shaikin esimdi jergilikti balyqshy Qyzyljar aýdanyndaǵy Báiterek aýylynyń mańynan alyp mamonttyń súiegin kezdeisoq taýyp alǵan.
Qazaqstan Respýblikasy Ǵylym jáne joǵary bilim ministrliginiń málimetinshe, oljany balyqshy arheolog Anatolii Pleshakovqa tapsyrǵan. Ekeýi birge oqiǵa ornyna baryp, jerdi teksergenimen, basqa súiekter tabylmady. Tarihshynyń aitýynsha, ejelgi janýardyń qalǵan bólikteri topyraq astynda jatýy múmkin.
— Bul óte qyzyqty tabys. Súiektiń uzyndyǵy shamamen 1 metr. Onyń jasy joǵarǵy paleolit dáýirine jatady — shamamen 15 myń jyl buryn. Ol óte iri janýarǵa tiesili bolǵan. Buǵan deiin de SQO aýmaǵynan ejelgi janýarlardyń súiekteri tabylǵan. Kelesi jyly osy jerde qazba jumystaryn júrgizemiz. Eger qańqanyń jalǵasyn nemese eńbek quraldaryn tapsaq, bul aimaq úshin alǵashqy paleolittik eskertkish bolmaq, — dedi arheolog Anatolii Pleshakov.
Mamannyń aitýynsha, aldaǵy qazba jumystary mádeni qabattar men artefaktardyń bar-joǵyn anyqtaýǵa múmkindik beredi. Eger dáleldense, bul jerde aýqymdy arheologiialyq izdenister jalǵasýy yqtimal.
