Soltústik Qazaqstan oblysynda 54 sheteldik azamat kóshi-qon zańnamasyn birneshe ret buzǵany úshin Qazaqstannan qýyldy. Bul týraly «QazAqparat» SQO IID baspasóz qyzmetine silteme jasap habarlady.
Sot olardy elden shyǵarý sheshimin ákimshilik zańnamanyń ózge de buzýshylyqtary úshin qabyldady. Sheteldikterdiń arasynda mundai zań buzǵandar sany - 7. Endi olar úshin Qazaqstan aýmaǵy 5 jylǵa jabyq.
Máselen, 45 jastaǵy Resei Federatsiiasynyń azamaty spirttik ishimdikter iship, jol erejesin buzǵany úshin birneshe ret jaýapqa tartylǵan bolatyn.
Al Petropavlda ruqsatsyz saýdamen ainalysqan Ózbekstan azamaty oblys ortalyǵynda birneshe ai turyp kelgen.
Qazirgi tańda Qazaqstannan ketýi kerek bolǵan 6 adam túrli sebeptermen sot qaýlysyn áli de oryndamady. Olardy oblystyq kóshi-qon qyzmetiniń qyzmetkerleri óz baqylaýyna aldy. Eger, olar sot sheshimin oryndamasa, qylmystyq jaýapqa tartylatyn bolady. Jyl basynan beri osyndai sipatta 8 qylmystyq is qozǵalǵan.
