Májilis depýtaty, «Nur Otan» partiiasy fraktsiiasynyń múshesi Meirambek Tólepbergen Premer-Ministrdiń orynbasary Eraly Toǵjanovqa el ishindegi óńiraralyq qonys aýdarý týraly depýtattyq saýalyn joldady, dep habarlaidy "Ult aqparat".
«24 mamyr kúni «Kazahstanskaia pravda» gazetinde «Zalojniki ravnodýshiia» atty maqala jaryq kórdi. Sol kólemdi maqalada óńiraralyq qonys aýdarýdyń jai-japsary bir oblystyń mysalymen taldap aityldy. Mine, osy maqalada kórsetilgen ótkir jáne óte qajetti máselege orai Memleket Basshysy Qasym-Jomart Toqaev tikelei ózi nazarǵa alyp, Prezident Ákimshiligine Soltústik Qazaqstan oblysy, Aiyrtaý aýdanyna qonys aýdarǵan azamattarǵa arnalyp salynǵan turǵyn úilerdiń sapasyn tekserý týraly tapsyrma berdi.
Bul qozǵalyp otyrǵan máseleniń memlekettik máni zor ekenin taǵy da kórsetti. Memleket Basshysy Qasym-Jomart Toqaev óziniń «Táýelsizdik bárinen qymbat» atty baǵdarlamalyq maqalasynda elimizdiń qaýipsizdigine tikelei qatysty ishki jáne syrtqy kóshi-qon máselesiniń elimizde erekshe mańyzy men ózektiligi bar ekenin atap ótti. Osy baǵytta el táýelsizdigi jyldarynda qyrýar is atqaryldy. Dei turǵanmen, Soltústik Qazaqstan jáne Shyǵys Qazaqstan oblystarynda demografiialyq jaǵdai áli de turaqtandyrylmai otyr», - dedi depýtat.
Onyń aitýynsha, demografiialyq jaǵdaiynyń qiyndyǵyna orai respýblikalyq biýdjet qarjysy esebinen qonys aýdarýshylardy turǵyn úimen qamtamasyz etý boiynsha pilottyq joba júzege asyrylyp jatqan Soltústik Qazaqstan oblysynyń Aqqaiyń, Aiyrtaý jáne Qyzyljar aýdandarynda ótken jyly qonys aýdarýshylarǵa arnalǵan baspanalar sapasyz salynǵandyǵy buqaralyq aqparat quraldary men áleýmettik jelilerde ótkir synaldy.
Joǵaryda baiandalǵannyń negizinde «Nur Otan» partiiasy Fraktsiiasynyń músheleri retinde kelesi usynystar engizildi:
1. Qazirgi ýaqytta ishki jáne syrtqy kóshi-qonnyń strategiialyq mańyzy artyp otyrǵandyǵyn jáne «Nur Otan» partiiasynyń sailaýaldy baǵdarlamasyn iske asyrý jónindegi Jol kartasyna sáikes, 2025 jylǵa deiin 80 myń qandastyń, onyń ishinde 2021 jyly 12 myń qandastyń qaita oralýyna járdemdesý josparlanǵandyǵyn eskerip, bir kezde Úkimet janynda bolǵan Kóshi-qon jáne demografiia agenttigin qaitadan qurý máselesin qarastyrǵan jón.
Sebebi, Eńbek jáne halyqty áleýmettik qorǵaý ministrliginiń Eńbek, áleýmettik qorǵaý jáne kóshi-qon komiteti kóshi-qon máselelerimen jetkilikti ainalysady deý qiyn. Atalǵan agenttikti qurý shetelderde jumys istep júrgen qazaqstandyqtardyń quqyqtaryn qorǵaý turǵysynan da qajet.
2. Sońǵy jyldary otandastardyń Soltústik Qazaqstan jáne Shyǵys Qazaqstan oblystaryna qonys aýdarý protsesi baiaýlap qalǵan, sol sebepten jergilikti atqarýshy organdar osy jumysty jandandyrýy tiis. Óitkeni bul máseleler memleket pen halyqtyń múddeleri turǵysynan strategiialyq mańyzǵa ie.
3. Qandastar men qonys aýdarýshylardy óńirlerde qabyldaý, jumysqa ornalastyrý jáne turǵyn úimen qamtamasyz etý máselelerine júieli monitoring júrgizip, turaqty baqylaýda ustaý, sondai-aq kóshi-qon salasyndaǵy memlekettik saiasatty iske asyrýǵa tiisti basshylardyń jaýapkershiligin qataita túsken jón.
4. Qarjy monitoringi agenttigi qonys aýdarýshylarǵa memlekettik qoldaý kórsetýge jáne olardy jumysqa qabyldaǵan sharýashylyqtarǵa tólengen sýbsidiialarǵa jumsalǵan biýdjet qarjysynyń maqsatqa sai jumsalýyna qajetti tekseris júrgizýi kerek.
